ShQO-ǵy shalǵaı 12 aýylǵa ınternet qosylýy múmkin
ASTANA. KAZINFORM — Shyǵys Qazaqstan oblysyndaǵy shalǵaı 12 aýylǵa OneWeb spýtnıktik ınternetin ornatý usynyldy. Sonymen qatar óńirdegi baılanys sapasy tómen aýmaqtardy ınternetpen qamtý jáne ınfraqurylymdy damytý jumystary jedeldetilmek. Bul týraly Jasandy ıntellekt jáne tsıfrlyq damý mınıstrligi málim etti.
Memleket basshysynyń halyqty sapaly baılanyspen jáne ınternetpen qamtamasyz etý jónindegi tapsyrmalaryn oryndaý, sondaı-aq «Qoljetimdi ınternet» ulttyq jobasyn júzege asyrý aıasynda Shyǵys Qazaqstan oblysynda keshendi jumystar júrgizilip jatyr. Osy baǵytta QR Jasandy ıntellekt jáne tsıfrlyq damý mınıstrliginiń Telekommýnıkatsııa komıteti óńirdegi baılanys sapasy tómen ári problemaly aýmaqtardy («aq daqtardy») tekserip, arnaıy jumys keńesin ótkizdi.
Kezdesýdiń basty maqsaty — óńirdegi ınfraqurylymdyq túıtkilderdi sheship, halyqty úzdiksiz ári sapaly ınternetpen qamtamasyz etý boldy. Inspektsııa barysynda telekommýnıkatsııa ınfraqurylymyn damytýdyń negizgi baǵyttary jan-jaqty saralandy.
Talshyqty-optıkalyq baılanys jelilerin tartý jobasy boıynsha Telekommýnıkatsııa komıtetiniń tóraǵasy Damır Seısembekov árbir eldi meken boıynsha jumystyń egjeı-tegjeıli kestelerin bekitýdi jáne olardyń oryndalýyn baqylaýdy kúsheıtýdi tapsyrdy. Sonymen birge ol shaǵyn aýyldardy jergilikti ákimdikpen kelispeıinshe jáne balama sheshimderin tappaıynsha qamtý josparynan alyp tastaýǵa jol berilmeıtinin basa aıtty.
Shalǵaı jáne qatynaýy qıyn eldi mekenderdi baılanyspen qamtamasyz etý úshin «sońǵy mılıa» jobasy aıasynda relefi kúrdeli 12 aýylǵa OneWeb spýtnıktik baılanys keshenderin ornatý usynyldy. Budan bólek, Tele2/Altel operatorynyń lıtsenzııalyq mindettemelerine kiretin 8 aýyldy josparlanǵan merzimnen buryn qosý máselesi qarastyrylyp jatyr.
Oblys ortalyǵy Óskemen qalasyndaǵy ınfraqurylymdy jaqsartý jumystary da qarqyndy júrip jatyr. Buǵan deıin anyqtalǵan 24 problemalyq orynnyń 22-si boıynsha másele tolyqtaı sheshimin tapty. Al qalǵan ýchaskeler boıynsha «ıAgodka» saıajaı alabynda elektr montajdaý jumystary aıaqtalyp keledi, «Bolashaq» shaǵynaýdanynda bazalyq stantsııa ornatýǵa alań tańdalýda, sondaı-aq qos maqsattaǵy 7 tireýishke jer telimderi rásimdelýde. Sonymen qatar, Lıharev kóshesi men jaǵalaý boıyndaǵy radıokedergilerdi joıý maqsatynda Baılanys ınspektsııasy, Memlekettik radıojıilik qyzmeti jáne Qylmystyq-atqarý júıesi departamentiniń qatysýymen birlesken radıomonıtorıng júrgizý josparlandy.
Inspektsııa qorytyndysy boıynsha komıtet tarapynan operatorlarǵa antenna-machtalyq qurylymdardyń múmkindigin tolyq paıdalaný jáne turǵyndarǵa sapaly qyzmet kórsetý úshin jabdyqtardy ornatý jumystaryn tezirek aıaqtaý júkteldi.
Buǵan deıin Qostanaı oblysyndaǵy aýyl alǵash ret ınternetke qosylǵanyn jazdyq.
