ShQO-ǵa Pfizer vaktsınasynyń 35 myńnan astam dozasy jetkizildi
ShQO Densaýlyq saqtaý basqarmasy baspasóz qyzmetiniń málimetine súıensek, óńirge Pfizer vaktsınasynyń 35 100 dozasy jetkizilgen.
«Qazirgi ýaqytta vaktsına partııasy Óskemen jáne Semeı qalalarynda qabyldanyp alyndy. Onyń ishinde 17 550 dozasyn Semeıdegi №1 emhananyń arnaıy daıyndyqtan ótken mamandary qabyldaǵan. Óskemende 17550 doza oblystyq qan ortalyǵyna jetkizildi. Transporttaý jáne qabyldaý barysynda barlyq tıisti erejeler men talaptar qatań saqtaldy», - delingen aqparatta.
Aldaǵy ýaqytta vaktsına oblystyń qalalary men aýdandaryndaǵy medıtsınalyq mekemelerge tasymaldanady.
«Vaktsına dozalary jetkizilgen eki mekemede kólemi 300 lıtrdi quraıtyn qosymsha eki muzdatqysh jabdyqtar ornatyldy. Aýdandyq medıtsınalyq uıymdar da tıisti daıyndyqtan ótip, kólemi 130 lıtr bolatyn 16 muzdatqyshpen qamtylǵan», - delingen habarlamada.