ShQO-ǵa Ózbekstannan 800 qurylysshy tartylmaq
Kezdesý barysynda ekonomıkalyq yntymaqtastyq, onyń ishinde týrızm salasyndaǵy seriktestik máseleleri talqylandy. Sonymen qatar, eńbek kóshi-qony baǵytyndaǵy birlesken jumys múmkindikteri sóz etildi. Bul rette Ózbekstan Respýblıkasynyń Bas konsýly Abror Fathýllaev óz eliniń azamattaryn eńbekke tartýda ShQO-nyń tájirıbesi basqalarǵa úlgi ekendigin atap ótti.
«El Prezıdenti ótken jyldyń tamyz aıynda qaýipsiz eńbek kóshi-qonyn uıymdastyrý týraly qaýly shyǵardy. Bul turǵyda biz Shyǵys Qazaqstan kompanııalarymen seriktestikke múddelimiz. Keshe «Servıs SMÝ« kompanııasynyń basshylyǵymen kezdesip, qurylys nysandaryn kórdik. Onda jumys isteıtin mıgranttarmen júzdestik. Eń bastysy, sizderdiń oblystaryńyzdaǵy qurylys kompanııalary jumysqa tartý sharalaryn zańnamaǵa sáıkes júzege asyrady», – dedi ol.
Sondaı-aq Abror Fathýllaev ShQO-ǵa jumys kúshiniń qajettiligi boıynsha qyzmetkerlerdi qabyldaýǵa kómektesýge daıyn ekenin aıtty.
«Memorandýmmen jiti tanysyp shyqtym. Tolyqtaı qoldaımyn. Bizdiń birinshi mindetimiz – Ózbekstannan kelgen azamattardy qabyldap, laıyqty jaǵdaı jasaý. Barlyq tıisti tapsyrmalar berildi. Ózbekstandyq baýyrlarymyz jumys isteıtin qurylys kompanııalaryn bilemin, olarmen jýyqta kezdestim. Eger qandaı da bir kemshilikter bolsa, qysqa merzimde joıylady. Jalpy óńirde qurylys salasyndaǵy kadrlarǵa suranys joǵary. Jaqyn arada biz 800 adamǵa ótinim beremiz», - dedi Danıal Ahmetov.
Sonymen qatar aımaq basshysy mashına jasaý salasynda baýyrlas elderdiń jaqsy jumys isteı alatynyn atap ótti. Sebebi Ózbekstanda mashına jasaý zaýyty bar, al Shyǵys Qazaqstanda túrli tehnıkalar jınaqtalady.
