ShQO-ǵa menıngıtke qarsy brıtanııalyq vaktsına jetkizildi
ÓSKEMEN. QazAqparat - Shyǵys Qazaqstanǵa menıngokokk juqpasyna qarsy brıtanııalyq vaktsına jetkizildi. Onyń baǵasy ózge oblystardan 14 myń teńgege arzan túspek, dep habarlaıdy QazAqparat tilshisi.
Bul týraly oblystyq densaýlyq saqtaý basqarmasy basshysynyń orynbasary Raıfa Safıollanova arnaıy brıfıngte aıtty. Vaktsına Óskemen boıynsha №2 qalalyq emhanada, Semeı qalasynda da №2 emhanada aqyly túrde qoıylady. Brıtanııalyq preparat juqpanyń A, S, W135, Y toptaryna arnalǵan.
«Jalpy menıngokokk qozdyrǵyshy 12 topqa bólinedi. Biz ákelgen ekpe sonyń tórt tobyna jaramdy. Qorǵaý tıimdiligi 70 paıyz dep baǵalanǵan. Bir ret ekpe qabyldaǵan adamnyń aǵzasynda 5-6 jylǵa deıin ımmýndyq jady saqtalady. Bıyldan beri bizdiń oblysta atalmysh dertten kóz jumǵandar joq. ıAǵnı, óńirde juqpanyń naqty qaı túri taralýy múmkin ekeni belgisiz», - dedi Raıfa Safıollanova.
Onyń aıtýynsha, barlyq medbıkelerge ekpeni salý tásilderi úıretilgen. Aýyl turǵyndary ony aýdandyq aýrýhanalardan alatyn bolady.
«Ekpeniń qazirgi baǵasy 21 myń teńgeden asady. Bul - respýblıkadaǵy eń tómengi baǵa. Ózge óńirlerde dál osy vaktsına 35 myń teńgege qoıylyp jatyr. Baǵanyń ósýine jol bermes úshin, qatań baqylaýǵa alamyz», - dedi basqarma ókili.
