ShQO-ǵa Qytaıda satyp alynǵan medıtsına buıymdary jetkizildi
ShQO ákimi baspasóz qyzmetiniń málimetine súıensek, búgin saǵat 18.20-da medıtsına buıymdary tıelgen salmaǵy 14 tonnany quraıtyn júk Qytaıdan Óskemen áýejaıyna jetkizilgen. Onyń ishinde 100 myń ekspress-test, 18 myń qorǵanys kostıými, 80 myń respırator, 10 myń dana qorǵanys maskasy bar.
Oblys ákimi Danıal Ahmetovtiń aıtýynsha, medıtsınalyq buıymdar men arnaıy quraldardy satyp alý jáne tasymaldaý «Paryz» qoǵamdyq qory esebinen qarjylandyrylǵan. Taýarlardy qysqa merzim ishinde satyp alý qytaılyq seriktes – shyńjańdyq «San Bao» saýda-ónerkásiptik korporatsııasy JShS arqasynda múmkin boldy. Atalmysh kompanııa ShQO turǵyndary úshin óz esebinen 10 mln teńgeden astam somaǵa qosymsha Alena-310 markaly 2200 qorǵanys maskasyn, sondaı-aq 200 myń dana qan alý úshin birrettik ıneler men gradýırlengen tamyzǵyshtardy jibergen.
«Osylaısha, oblystyń barlyq ınfektsııalyq, provızorlyq jáne observatsııalyq statsıonarlarynyń qajettiligi tolyǵymen qamtamasyz etiledi. Ekspress-testten aldymen KVI-men kúreste aldyńǵy shepte júrgen mamandar ótkiziledi. Olar medıtsına, quqyq qorǵaý jáne sanıtarlyq-epıdemıologııalyq organdardyń qyzmetkerleri», - delingen aqparatta.
«Elbasy úndeýine sáıkes jáne el Prezıdentiniń tapsyrmasyn oryndaý aıasynda bizdiń oblys qysqa merzimde qytaılyq áriptestermen yntymaqtastyqta qajetti medıtsınalyq buıymdar men taýarlardy satyp aldy. Bul bizdiń jerlesterimizdiń densaýlyǵy men ómirin saqtaý úshin aldyńǵy qatarda jumys istep júrgen medıtsınalyq jáne sanıtarlyq-epıdemıologııalyq qyzmet mamandaryn COVID-19-dan qorǵaý quraldarynyń qoryn qamtamasyz etýge múmkindik beredi», – deıdi aımaq basshysy.
Taýarlardy tıep jóneltýge «Nur Otan» partııasynyń eriktileri de belsendi túrde qatysty. Oblystyń qalalary men aýdandaryna ary qaraı taratý úshin medıtsınalyq buıymdar Jumyldyrý daıyndyǵy basqarmasynyń qoımasyna jetkiziledi.
