ShQO-ǵa kóship kelgen eki otbasy ýáde etilgen úıdiń berilmegenine shaǵymdandy
ÓSKEMEN. KAZINFORM — Shyǵys Qazaqstan oblysy Tarbaǵataı aýdanyna memlekettik baǵdarlamamen basqa óńirden kóship kelgen eki otbasy ózderine ýáde etilgen úılerdiń berilmegenine shaǵymdandy. Al jergilikti bılik ókilderi olardyń baǵdarlama talaptaryna saı kelmegenin aıtyp otyr. Kazinform tilshisi máseleniń mánisine úńilip kórdi.
«Qabyrǵasy qulap jatyr»
Tarbaǵataı — Shyǵys Qazaqstandaǵy shekara mańyndaǵy aýdandardyń biri. Halyq sany azaıyp bara jatqandyqtan, oǵan basqa óńirlerdiń turǵyndary memlekettik baǵdarlama aıasynda tartylyp jatyr. Sol boıynsha kóship kelgenderdiń biri — segiz bala tárbıelep otyrǵan Bolat Dosbaevtyń otbasy.
2026 jyldyń naýryz aıynda Almaty oblysynyń Іle aýdanynan Ahmetbulaq aýylyna qonys aýdarǵan olar úsh aıdan keıin otbasynyń ár múshesine birjolǵy tólem berilgenimen, baspana máselesi áli kúnge deıin sheshilmegenin aıtady.
— Bizge ýaqytsha turatyn úı berildi. Jergilikti bılikke birneshe ret aıttyq, biraq nátıje joq. 15 kún ishinde beriledi degen baspanany alty aıǵa jýyq ýaqyt ótse de, áli ala almaı otyrmyn. Qazir edeni opyrylǵan, shatyry qulap turǵan úıde turyp jatyrmyz, — deıdi Bolat Dosbaev.
Onyń aıtýynsha, aýyl ishinen 2,5 mln teńgege satyp alynǵan úıdi kásipkerler jóndep, kiltin tabystaǵannan keıin baspanany rásimdeý toqtap qalǵan.
— Oǵan sebep retinde bank shottarymnyń buǵattalǵanyn aıtyp otyr. Keıin úıdi jubaıymnyń atyna rásimdemek bolǵanda, onyń Biryńǵaı jınaqtaýshy zeınetaqy qorynda turaqty aýdarymdarynyń bolýy talap etilgen. Al jubaıym balalarǵa qarap otyrǵandyqtan, turaqty tabysy joq. Endi segiz balammen qaıtadan Almaty oblysyna qaıtsam, jaldamaly páter tabýdyń ózi qıyn. Eki ortada qalyp otyrmyn. Baǵdarlama arqyly kóship kelgen soń eń quryǵynda úı máselesin sheship berse eken, — deıdi ol.
Budan bólek, atalǵan aýylǵa kóship kelgen Jandos Hazymnyń otbasy da úı berilmegenine shaǵymdandy. Tórt aıdaı ýaqyt buryn Taldyqorǵannan qonys aýdarǵan alty bala tárbıelep otyrǵan otbasy ýaqytsha baspanada turyp jatyr.
Ákimdik ne deıdi?
Tarbaǵataı aýdanynyń jumyspen qamtý jáne áleýmettik baǵdarlamalar bóliminiń basshysy Qurmanǵazy Slıamjanov eki otbasyǵa ne sebepti áli kúnge deıin úı berilmegenin túsindirip berdi.
— Otaǵasy Bolat Dosbaevtyń bank shotynda buǵattalýlar bolýyna jáne nesıe tarıhynyń «qara tizimde» bolýyna baılanysty ol baǵdarlama talaptary boıynsha jeke ózi óńirlik kvotadan ótpegen. Baǵdarlama shartyna sáıkes, turǵyn úı jóndeýden ótkizilip, daıyndaldy jáne ol jubaıy Anjela Zolotorevanyń atyna rásimdelýge tıis boldy. Degenmen zań boıynsha jyljymaıtyn múlikti jubaıynyń atyna tirkeý úshin Bolat Dosbaevtyń notarıattyq kelisimi talap etiledi. Al Bolat Dosbaevtyń banktik shottarynyń buǵattalýy men nesıelik bereshegi dál osy notarıattyq kelisim berý jáne múlikti zańdastyrý protsesine tikeleı kedergi keltirdi. Osy zańnamalyq kedergige baılanysty qazirgi tańda turǵyn úı resmı túrde jeke menshikke berilgen joq, — dedi ol.
Osy rette «Baǵdarlama talaptaryna sáıkes qatysýshylardyń qujattary, onyń ishinde mindetti áleýmettik aýdarymdarynyń keıingi 6-12 aıda tólenýi, jeke nesıelik bereshegi jáne ózge de talaptarǵa sáıkestigi qonys aýdarmas buryn tekserile me?» degen zańdy saýal týyndaıdy. Bólim basshysyna bul suraqty da qoıdyq.
— Azamattardy óńirlik qonys aýdarý kvotasyna engizý protsesi Qazaqstan Respýblıkasy Eńbek jáne halyqty áleýmettik qorǵaý mınıstriniń 2023 jylǵy 22 maýsymdaǵy № 234 buıryǵymen bekitilgen «Jumys kúshiniń utqyrlyǵyn arttyrý úshin adamdardyń erikti túrde qonys aýdarý qaǵıdalaryna» sáıkes júzege asyrylady. Ótinishti «Enbek.kz Migration» portaly arqyly tapsyrý kezinde qatysýshylardyń negizgi qujattary júıede avtomatty túrde tekseristen ótedi. Degenmen atalǵan № 234 buıryqtyń erejelerinde azamattardyń mindetti áleýmettik aýdarymdaryn aldyn ala tekserý qarastyrylmaǵan. Qatysýshylardyń, onyń ishinde otbasyndaǵy eńbekke qabiletti adamdardyń «úzilissiz keıingi 12 aıdaǵy mindetti áleýmettik aýdarymdarynyń bolýy» týraly jańa talap QR Eńbek jáne halyqty áleýmettik qorǵaý mınıstriniń 2026 jylǵy 28 mamyrdaǵy № 209 buıryǵymen engizilgen tolyqtyrýlar men ózgeristerge sáıkes belgilendi. Osyǵan baılanysty atalǵan zańnamalyq talapqa sáıkestik turǵyn úıdi resmı túrde jeke menshikke rásimdeý kezeńinde anyqtalyp, talaptar tolyq oryndalmaǵandyqtan, turǵyn úı berilmedi. Azamattardyń jeke nesıelik bereshegi men banktik shottaryna qatysty shekteýlerdi aldyn ala tekserý Mansap ortalyǵynyń quzyretine jatpaıtyndyqtan, anyqtalmady, — deıdi Qurmanǵazy Slıamjanov.
Onyń aıtýynsha, Jandos Hazymnyń otbasyna úıdi rásimdeý kezinde «keıingi 12 aıda tólengen» mindetti áleýmettik aýdarymdarynyń bolýy talap etildi. Degenmen atalǵan talap saqtalmaǵandyqtan, turǵyn úıdi zańnamada kózdelgen merzimde menshikke rásimdeý múmkin bolmady.
— Otbasyn baspanasyz qaldyrmaý maqsatynda Ahmetbulaq aýylynda ýaqytsha tegin turǵyn úı berildi. Zańnama talaptary oryndalǵannan keıin turǵyn úıdi rásimdeý máselesi belgilengen tártippen qaralady, — dedi aýdandyq jumyspen qamtý jáne áleýmettik baǵdarlamalar bóliminiń basshysy.
Belgili bolǵandaı, Bolat Dosbaevtyń otbasyna kóshýge arnalǵan birjolǵy materıaldyq tólem 2 724 750 teńge mólsherinde tólengen. Mamyr jáne maýsym aılarynda eki aıǵa jıyny 727 044 teńge ataýly áleýmettik kómek, eki balaǵa mamyr-maýsym aılaryna 25 952 teńge kóleminde memlekettik áleýmettik paket berildi. Al Jandos Hazymnyń otbasyna 2 422 000 teńge kóleminde kóshýge arnalǵan birjolǵy materıaldyq tólem, mamyr jáne maýsym aılarynda eki aıǵa jıyny 150 834 teńge ataýly áleýmettik kómek, eki balaǵa mamyr-maýsym aılaryna 25 952 teńge memlekettik áleýmettik paket berilgen. Sondaı-aq aýdandyq komıssııanyń sheshimimen, atalǵan eki qonys aýdarýshy otbasyǵa qosymsha 200 000 teńgeden birjolǵy qarjylaı kómek kórsetildi.
Eske salaıyq, osyǵan deıin qonys aýdarý jáne jumysqa ornalasý múmkindigin endi onlaın baǵalaýǵa bolatynyn habarlaǵanbyz.
