ShQO-ǵa koronavırýsqa qarsy vaktsınanyń 80 myńnan astam dozasy jetkizilmek
ÓSKEMEN. QazAqparat – Shyǵys Qazaqstan oblysyna sáýir aıynda koronavırýsqa qarsy vaktsınanyń 80 myńnan astam dozasy jetkizilmek, dep habarlaıdy QazAqparat tilshisi.
ShQO Densaýlyq saqtaý basqarmasy basshysynyń orynbasary Nurlanǵazy Ibraev onlaın formatta ótken baspasóz máslıhatynda óńirdegi vaktsınatsııalaý jumystarynyń qalaı júrgizilip jatqandyǵyn aıtyp berdi.
«Sáýir aıynyń sońyna deıin halyqty jappaı vaktsınatsııalaýǵa qajetti dozalar jetkiziledi. Adam kóp jınalatyn jerlerde vaktsınatsııa pýnktteri jumysyn bastaıdy. Qazirgi ýaqytta oblysta reseılik «Spýtnık V» preparatynyń birinshi jáne ekinshi komponentteriniń 36 400 dozasy bar», - dedi ol.
Nurlanǵazy Ibraevtyń aıtýynsha, vaktsınalardyń jetkizilýi kestesi jasalyp, ony biryńǵaı dıstrıbıýtor SK-Farmatsııa júzege asyrýda. Osy aıdyń sońyna deıin taǵy 82200 doza jetkiziledi.
«Sodan keıin óńir jurtshylyǵy vaktsınatsııa pýnktterine shaqyryla bastaıdy. Qazir oblys ákimi Danıal Ahmetovtiń tapsyrmasymen bul oryndar anyqtalýda. Onda jumys isteıtin medıtsına qyzmetkerlerin daıyndyqtan ótkizemiz», - dedi basqarma basshysynyń orynbasary.
Aıta keteıik, búginde Shyǵys Qazaqstanda 12 425 adam koronavırýsqa qarsy vaktsınanyń birinshi komponentin alǵan.
