ShQO-ǵa kelgen týrısterden ishinara PTR anyqtamasy talap etiledi
ShQO Sanıtarlyq-epıdemıologııalyq baqylaý departamenti basshysynyń orynbasary Sáýle Slámǵazına onlaın formatta ótken baspasóz máslıhatynda jaz kezinde týrızm salasyna qoıylatyn talaptardy atap ótti.
«QR Bas memlekettik sanıtarlyq dárigeriniń qaýlysyna sáıkes, «sary» jáne «jasyl» aımaqta turǵan óńirdegi qonaq úılerdiń, demalys bazalarynyń, sanatorıılik-kýrorttyq uıymdardyń qyzmetine ruqsat berilgen. Aldaǵy týrıstik maýsym boıynsha indettiń aldyn alý jónindegi sharalardy aıqyndaıtyn arnaıy qaýly shyǵarýdy josparlap otyrmyz. Qaýly jobasyna sáıkes týrıstik jáne rekreatsııalyq aımaqtarda ornalasqan demalys oryndarynyń ıeleri shekteý sharalary jaǵdaıynda jumysqa ázirlik aktisin alýǵa tıis. Tek sodan keıin jumysqa kirisýine bolady. Bul qujatty monıtorıngilik toptyń obektini tekserý nátıjeleri boıynsha aýmaqtyq sanıtarııalyq-epıdemıologııalyq baqylaý basqarmasy beredi», - dedi ol.
Sonymen qatar úı ıeleri www.infokazakhstan.kz saıtynan elektrondy formatta beriletin sanıtarlyq normalarǵa sáıkestik aktisin alýy qajet. Vırýs órship turǵan aımaqtardan kelgen týrıstterde COVID-19-ǵa tapsyrylǵan PTR-synamanyń teris nátıjesi bolýy tıis. Bul rette, eger azamatta synamanyń teris nátıjesi bolsa, onda onyń qasynda erip júrgen bes jasqa deıingi balalardan PTR-synama talap etilmeıdi. Demalysqa kelgen bir otbasy múshelerinde tek 1 synama nátıjesi bolsa jetkilikti.
«Demalys oryndarynyń toltyrylýy 80 paıyzdan aspaýy tıis. Kelýshilerdiń jartysy ǵana bir ýaqytta tamaqtaný oryndaryna kire alady. Shetki ústelderdegi oryndyqtar arasyndaǵy áleýmettik araqashyqtyq bir jarym metrden kem bolmaýy qajet. Budan bólek, sýǵa túsý oryndaryn qospaǵanda, barlyq qoǵamdyq oryndarda maska rejımi jáne áleýmettik araqashyqtyq qatań saqtalady. Qaýly jobasy qazir ShQO ákimi apparaty men sanıtarlyq-epıdemıologııalyq baqylaý komıtetine kelisýge joldandy. Eger Shyǵys Qazaqstan «qyzyl» aımaqqa ótetin bolsa, onda karantındik sharalar odan ári qatańdatylady», - dedi Sáýle Slámǵazına.
