ShQO-ǵa keletin týrıster sany jyl saıyn ósedi dep boljanýda

ÓSKEMEN. QazAqparat – Shyǵys Qazaqstan oblysyna keletin týrıster sany jyl saıyn 3 paıyzǵa artyp otyrmaq, dep habarlaıdy QazAqparat tilshisi.

ShQO ákimdiginiń málimetine súıensek, óńirde týrızm salasyna erekshe kóńil bólinýde. Týrızmniń emdik-saýyqtyrý, qysqy, aýyldyq, ekologııalyq, etnografııalyq jáne gastronomııalyq túrleri damyp keledi.

«Týrısterdi ornalastyrý oryn­darynyń sanyn ulǵaıtý, ký­rorttyq aımaqtardaǵy demalys bazalaryn, tarıhı jáne kıeli sáýlet oryndaryn abattandyrý, týrıstik marshrýttar sanyn arttyrý jáne kór­setiletin qyzmetterdi ke­ńeıtý arqyly týrıster aǵyny jyl saıyn keminde 3 paıyzǵa ósedi dep kútilýde. Úrjar aýdanyndaǵy Alakól jaǵalaýynda saýyqtyrý jáne jaǵa­jaı týrızmi qarqyndy damyp keledi. Bıyl 962 tósek-oryndyq 19 jańa demalys bazasy paıdalanýǵa berildi. Jyl sońyna deıin 800 tósek-orynǵa arnalǵan 5 demalys úıiniń quryly­syn aıaqtaý josparlanǵan», - dedi aımaq basshysy Danıal Ahmetov.

Katon­qaraǵaı aýdanynda sanatorıılyq-kýrorttyq emdeý qyzmetin keńeıtý maqsatynda 130 tósek-orynǵa ar­nalǵan qonaqúılerdiń qurylysy aıaq­taldy.

«Kıeli jerlerge baıla­nys­ty týrızm de mańyzdy ról atqarady. Búginde tarıhı oryndarǵa baratyn 27 týrıstik marshrýt ázirlendi. Tehno­týrızm salasy da nazardan tys qalǵan joq. Kýr­chatov qalasyndaǵy Ulttyq ıadrolyq orta­lyqqa barǵysy keletinder sany ót­ken jylmen salystyrǵanda 25%-ǵa artyp, 1 396 adamǵa jetti», - dedi oblys ákimi.