ShQO-ǵa qashyqtan ólsheıtin 5 myń dana termometr jetkizildi
ÓSKEMEN. QazAqparat – Shyǵys Qazaqstan oblysynyń polıtsııa qyzmetkerleri turǵyndardyń dene qyzýyn teksergende qashyqtan ólsheıtin termometrdi paıdalanbaq, dep habarlaıdy QazAqparat.
Bul jaıly aımaq basshysy Danıal Ahmetov óziniń Facebook paraqshasynda jazdy.
«Óńirimizge 5000 dana qashyqtan ólsheıtin termometr jetkizildi. Olar Óskemen men Semeıdegi kezekshilikte júrgen polıtsııa qyzmetkerlerine beriledi. Osylaısha, biz kóshedegi azamattardyń dene qyzýyn ólsheıtin bolamyz. Atalmysh termometrler denege tıgizilmeıdi jáne onyń esh zııany joq. Sondyqtan turǵyndardan túsinistik tanytyp, polıtseılerdiń bul áreketine úreılenbeýlerin suraımyn. Іri kásiporyndarda jumys isteıtinder mundaı tekseristen kún saıyn ótedi. Ol adamnyń ystyǵy kóterilgenin anyqtap, jedel kómek kórsetýge múmkindik beredi», - deıdi ákim.
Onyń aıtýynsha, búginde oblysta 12 myń adam 42 500 teńge mólsherinde áleýmettik tólem aldy. Jalpy aımaq boıynsha 100 myńnan astam ótinish kelip túsken.
«Qazposhta men bank bólimshelerinde qyzmetkerler sanyn 900-den 1500-ge deıin kóbeıtý týraly sheshim qabyldadym. Bul halyqqa ýaqtyly qyzmet kórsetý úshin qajet. Sonymen qatar barlyq bólimshelerdiń jumys ýaqyty keshki saǵat 21.00-ge deıin uzartyldy. Demalys kúnderi de arnaıy áleýmettik esepshot ashyp, járdemaqyny alýǵa bolady», - deıdi Danıal Ahmetov.
