ShQO-ǵa basqa óńirden kelgen esirtki taratýshy ustaldy

ÓSKEMEN. KAZINFORM – Polıtseıler Óskemen qalasyna basqa oblystan kelgen esirtki taratýshyny ustady.

ShQO polıtsııa departamenti baspasóz qyzmetiniń málimetinshe, tintý kezinde jedel ýákilder er adamnan ekstazı tabletkalaryn, 30 gramdaı α-PVP jáne 40 gramǵa jýyq mefedrondy tárkilegen. Anyqtalǵandaı, ol qyrkúıek aıynda Óskemenge basqa oblystan kelip, jaldamaly páterde turyp jatqan. 

«Esh jerde jumys istemegen jigit tanymal messendjerdegi paraqsha arqyly esirtki taratýmen aınalysty. Aıǵaq retinde kúdiktiniń smartfonyndaǵy sıntetıkalyq esirtkilerdi jasyratyn oryndardyń fotosýretteri men basqa da óndiriletin esirtki týraly málimetter alyndy», - delingen aqparatta. 

Esirtki, psıhotroptyq zattardy, sol tektesterdi asa iri mólsherde berý, ótkizý nemese jóneltý maqsatynda zańsyz ıemdený, saqtaý, tasymaldaý faktisi boıynsha sotqa deıingi tergeý amaldary júrgizilýde. Kúdikti ýaqytsha ustaý ızolıatoryna qamaldy. Ol 10-nan 15 jylǵa deıingi merzimge bas bostandyǵynan aıyrylýy múmkin. 

Eske salsaq, osyǵan deıin Óskemende 25 jastaǵy jigit saıajaıyn esirtki zerhanasyna aınaldyrǵany habarlanǵan.