ShQO-ǵa 300-den astam dáriger jetispeıdi
ÓSKEMEN. QazAqparat – Shyǵys Qazaqstan oblysynda medıtsına qyzmetkerlerin jumysqa tartý úshin jas mamandarǵa baspana berilmek, dep habarlaıdy QazAqparat tilshisi.
Búgin oblys ákimdiginde ótken jınalys barysynda densaýlyq saqtaý jáne jolaýshy tasymaly salalaryna qatysty birqatar máseleler talqyǵa salyndy.
«Densaýlyq saqtaý basqarmasynyń jumysynda kemshilikter bar. Máselen, qan aınalymy júıesi aýrýlarynan bolatyn ólim onkologııaǵa qaraǵanda joǵary. Biraq áli kúnge deıin birde-bir kardıolog oqýǵa jáne biliktilik arttyrýǵa jiberilmegen. Bul máseleni tezdetip sheshý kerek», - dedi ShQO ákimi Danıal Ahmetov.
Óz sózinde ol medıtsına qyzmetkerleriniń tapshylyǵy máselesin sheshý úshin qalalar men aýdandardyń ákimderine «Birqabatty Shyǵys» baǵdarlamasy aıasynda jas mamandarǵa turǵyn úı bólýdi tapsyrdy. Búgingi tańda óńirde 323 dáriger jetispeıdi.
«Óskemen qalasy men Úrjar aýdanyndaǵy áýejaılarda jóndeý jumystary aıaqtalýǵa jaqyn. Zaısandaǵy áýe aılaǵyn rekonstrýktsııalaý jobasy ázirlenip jatyr. Sondaı-aq «Oblshyǵysjol» JShS qaramaǵyna ótkennen keıin «Qyzyl Tý» ótkeliniń jumysy úzilissiz jáne kestege sáıkes júretin bolady», - dedi aımaq basshysy.
