ShQO ekologııa departamenti basshysynyń orynbasary para alǵany úshin 7 jylǵa sottaldy

ÓSKEMEN. KAZINFORM – Shyǵys Qazaqstan oblysy ekologııa departamenti basshysynyń orynbasary 30 myń dollar para alǵany úshin 7 jylǵa bas bostandyǵynan aıyryldy.

ShQO soty baspasóz qyzmetiniń málimetine súıensek, Óskemen qalasynyń №2 sotynda iri mólsherde para aldy degen aıyp taǵylǵan oblystyq ekologııa departamenti basshysynyń eks-orynbasaryna qatysty qylmystyq is qaraldy.

- Belgili bolǵandaı, departament jergilikti altyn óndirý fabrıkasyna QR ekologııalyq zańnamasy normalarynyń saqtalýyna tekseris jasaǵan. Sol kezde qurylysty aıaqtaý merzimderine qatysty jobadan aýytqý boıynsha birqatar buzýshylyq anyqtaldy. Zań boıynsha osy úshin kásiporynnyń qyzmeti toqtatylýy kerek. Alaıda sottalýshy JShS-ni jaýapkershilikke tartpaý úshin 2023 jyldyń mamyr aıynda kompanııa dırektorynan 30 000 AQSh dollary somasynda para alǵan. Bul 13 326 600 tenge, - delingen aqparatta.

Sot sheshimimen aıyptalýshy 7 jylǵa bas bostandyǵynan aıyryldy. Sondaı-aq oǵan ómir boıyna memlekettik qyzmette jumys isteýge tyıym salyndy. Úkim zańdy kúshine engen joq.

Eske salsaq, osyǵan deıin ShQO ekologııa departamentiniń burynǵy basshysy sottalǵany habarlanǵan.