ShQO: Eki aýdanda sý tasqynyna qarsy sharalar tekserildi
ShYǴYS QAZAQSTAN OBLYSY. QazAqparat - Shyǵys Qazaqstan oblysy ákiminiń birinshi orynbasary Erlan Aımuqashev eki aýdandaǵy sý tasqynyna qarsy sharalardy tekserdi, dep habarlaıdy QazAqparat ShQO Aqparattyq ortalyǵyna silteme jasap.
Shemonaıha aýdanynyń ákimi Grıgorıı Akýlovtyń aıtýynsha, Úlbi ózeninde muzdy jarý jumystary júrgizilgen, ózenniń arnasy men tarmaqtary baqylaýda. Jaǵdaıǵa kóz jetkizgen Erlan Aımuqashev kezekshilik uıymdastyryp, turǵyndarǵa shuǵyl kómek berý jaıyn aldyn ala oılastyrýdy tapsyrdy.
Ýbınka aýylynda taýdaǵy qardyń erýinen shyqqan sý Bolashaq jáne Ýkraına kóshelerimen aǵady. Aýyl qarttarynyń aıtýynsha, jyldaǵy jaǵdaı osy. TJD bergen aqparatqa súıensek, mundaǵy turǵyn úılerge tóngen qaýip joq.
Erlan Aımuqashev Ýbınka aýylyndaǵy aýlanyń árqaısysyn jeke qarap shyǵyp, jaǵdaıdy únemi baqylaýda ustaýdy tapsyrdy.
«Qajetti kómektiń bári kórsetildi. Qajet bolǵan jaǵdaıda azyq-túlik tasymaly uıymdastyrylady. Jedel járdem kereginshe kezekshilik uıymdastyrady», - dedi ol.
Jergilikti turǵyndardyń aıtýynsha, mundaı jaǵdaı ádette bir aptaǵa sozylatyn kórinedi.
Budan tys, ShQO ákiminiń birinshi orynbasary Basqaraǵaı aýdanynyń Krasnyı ıAr jáne Jańa Shúlbi aýyldaryna bardy. Mundaǵy kólderdiń sý deńgeıiniń kóterilýi tasqyn qaýpin arttyryp otyr.
Qazir jergilikti kólderdegi sýdan úılerdi qorǵaý úshin bógetter salynyp jatyr.
«Komıssııa usynǵan sharalardyń barlyǵy qarastyrylyp jatyr. Sý basqan eki úıdiń turǵyndaryn qaýipsiz jerge kóshirdik. TJD men ákimdik qolda bar múmkindiktiń bárin jumsap otyr. Eshkimdi de nazardan tys qaldyrmaımyz», - dedi E. Aımuqashev.
Aýdan ákimi Dáýlet Batyrbaevtyń aıtýynsha, sý tasqynyna qarsy kúreske óńirdegi aldyńǵy qatarly joǵary oqý oryndarynyń ǵalymdar ázirlemesiniń de sebi tıip otyr. D. Serikbaev atyndaǵy ShQMTÝ mamandary kelip, kórshi Pavlodar oblysynyń ozat tájirıbelerin túsindiredi.
Onyń ózine qaraǵanda, qysta jergilikti belsendiler topyraqtan kóterme salý ıdeıasyn usynǵan.
«Kótermeniń arqasynda sý tasqynyn shamamen 60 paıyzǵa azaıtýǵa qol jetkizdik. Tasyǵan sý bizdiń kóshege de, úıge de jetti, biraq oǵan qamyǵatyn biz emes», - deıdi aýyl turǵyndarynyń biri Vıktor Şerbakov.
Tasqynǵa qarsy sharalar jalǵasýda.
