ShQO Dostyq úıiniń 600 volonteri qarttar men kópbalaly otbasylarǵa kómektesýde

ÓSKEMEN. QazAqparat – Tórtkil dúnıege órt sharpyǵan qamystaı tez taraǵan koronavırýs keseline áli de tosqaýyl qoıylmaı tur. Qaýipti dert jaılaǵan qysyltaıań shaqta tasada qalmaı buqaraǵa bir kisideı kómektesip júrgen volonterler de az emes. Solardyń biri – ShQO Dostyq úıi-qoǵamdyq kelisim ortalyǵynyń eriktileri. QazAqparat tilshisiniń atalmysh ortalyq dırektorynyń orynbasary Ravıl ıÝnýsovpen suhbaty jigerli jastardyń jumysy jaıly.

- Shyǵys Qazaqstan oblystyq Dostyq úıi-qoǵamdyq kelisim ortalyǵynyń eriktileri Tótenshe jaǵdaı kezinde qandaı jumystar atqarýda?

- Juqpaly indettiń jurt arasynda jyldam taralýyn boldyrmaý maqsatynda Qazaqstan Respýblıkasynyń Prezıdenti Qasym-Jomart Toqaev der kezinde tıisti sharalardy qabyldady. Óskemen men Semeı qalalarynda 2 sáýirden bastap qosymsha shekteýler engizilgen bolatyn. Sol sátten bastap bizdiń eriktiler atqa qondy. Qazynaly qarttarǵa, kópbalaly januıalar men múgedekterge azyq-túlik jetkizemiz. Sondaı-aq dári-dármek pen medıtsınalyq maskalardy muqtaj jandarǵa taratamyz. Dostyq úıinde etnomádenı birlestik bar. Olar jan-jaqtan qıyndyqqa tap bolǵan januıalardy anyqtap, bizge aqparat beredi. Osyndaı syn saǵatta qalaısha tasada qalamyz?! Bárimiz bir jaǵadan bas, bir jeńnen qol shyǵaryp áreket etsek alynbaıtyn qamal joq.

- Jalpy osyndaı sharalarǵa qansha volonter tartylǵan?

- Oblys boıynsha 600-ge jýyq volonterimiz jumys isteýde. Óskemen qalasyndaǵy eriktilerdiń sany 100-den asady. Olardyń qatarynda túrli etnos ókilderi kezdesedi. Qazaq, orys, belarýs, ýkraın, tatar, sheshen, armıan, ázerbaıjan taǵy basqa ulttardyń jastary jumyla jumys istep jatyr. Bizdiń ultymyz ár túrli bolsa da túpki maqsatymyz bireý. Ol – qoǵamǵa paıdamyzdy sińirý, qarapaıym halyqqa kómek kórsetý.

- Volonterler jylynda qandaı josparlaryńyz bar?

- Tótenshe jaǵdaı aıaqtalǵansha, osy maqsattaǵy sharalardy atqara bermekpiz. Al sodan keıin oıǵa alǵan isterimiz az emes. Jastar arasynda volonterlikti nasıhattap, qazir qatarymyzda júrgen eriktiler úshin semınar-trenıngter ótkizýdi kózdep otyrmyz. Apta saıyn ekologııalyq senbilikke shyqpaqpyz. Abaı Qunanbaıulynyń 175 jyldyǵy aıasynda jastardy uly aqynnyń mekeni bolǵan Jıdebaıǵa aparý josparda bar. Sonymen qatar qaıyrymdylyq sharalary men túrli fleshmobtar uıymdastyrylady. Jyl sońynda ózin jaqsy qyrynan kórsetken úzdik volonterler marapattalatyn bolady.

- Erikti bolǵysy keletin adamnyń boıynda qandaı qabilettiń bolǵany jón?

- Kez kelgen adam volonter bola alady. Biraq ol úshin onyń boıynda meıirim men janashyrlyq bolýy kerek dep esepteımin. Aınalasynda oryn alyp jatqan san alýan jaǵdaılarǵa nemquraılylyq tanytpaı, bireýge kómektesýdi ómirlik mindeti dep sanasa quba-qup.

- XXI ǵasyrdyń jastary qandaı bolýy kerek?

- Búgingi zaman jastarynyń bilimge qushtar bolǵany abzal. Mekteptegi, ýnıversıtettegi oqýmen shektelip qalmaı, ózińdi únemi damytyp otyrýy qajet. Sebebi artyq bilim bolmaıdy. Túrli kitap oqyp, shyńdala tús. Jumys istep júrgen mamandyǵyńdy ǵana ıgerip qoımaı, basqa da salalardan habardar bolsań artyq etpeıdi.

- Suhbatyńyzǵa kóp raqmet.