ShQO densaýlyq saqtaý basqarmasynyń burynǵy basshysy raqymshylyqqa ilindi
ÓSKEMEN. QazAqparat - Shyǵys Qazaqstan densaýlyq saqtaý basqarmasynyń burynǵy bastyǵy Vadım Ovsıannıkov pen onyń qol astynda jumys istegen Valerııa Spırına birinshi ınstantsııa sotynyń sheshimimen raqymshylyqqa ilikti, dep habarlaıdy «QazAqparat» HAA tilshisi oblystyq sottyń baspasóz qyzmetine silteme jasap.
«Ovsıannıkovtyń» isin qaraýdy №2 qalalyq sot ótken jyly qyrkúıek aıynda bastaǵan edi. Basshymen birge qylmysqa ıtermeledi dep aıyptalǵan dári-dármekpen qamtamasyz etý bóliminiń basshysy da sottan bir-aq shyqty.
Óskemen qalalyq soty qylmystyq isti qaraýdy aıaqtady jáne sheshim shyǵardy: V. Ovsıannıkovty QR Qylmystyq kodeksiniń eki baby boıynsha, 361-bap, 2-bólim («Laýazymdyq ókilettikti asyra paıdalaný») jáne 366-bap, 1-bólim («Para alý»), al V.Spırına - qyzmettik ókilettigin asyra paıdalaný jáne qylmysqa ıtermeleý boıynsha aıypty dep tanyldy.
Sot anyqtaǵandaı, «Ovsıannıkov V. ShQO densaýlyq saqtaý basqarmasynyń basshysy bolyp eńbek etip, oblystyń medıtsınalyq mekemeleriniń bas dágirgerlerinen zańsyz túrde aqshalaı qarajat jınaǵan. Odan bólek, Ovsıannıkov V. «ShQO densaýlyq saqtaý basqarmasy» MM dári-dármekpen qamtamasyz etý bóliminiń jetekshisi Spırına V.-men birigip, bas paıdasy úshin dári-dármek jetkizýshiler jeńimpazdaryn anyqtaý jónindegi zańsyz sheshim qabyldaýda jáne iske asyrýda qyzmettik ókilettigin asyra paıdalanǵan».
Sot Ovsıannıkovty 4 jylǵa, al V.Spırınany 3 jylǵa bas bostandyqtarynan aıyrdy, ekeýiniń de múlki tárkilenip, memlekettik qyzmet atqarýǵa ómir boıyna tyıym salyndy. Alaıda eki tulǵa da QR Táýelsizdiginiń 25 jyldyǵyna oraı raqymshylyqqa ilinip, bostandyqqa shyqty. V. Ovsıannıkovtyń ótelmegen jaza merzimi 827 051 teńge aıyppulǵa aýystyryldy, biraq tárkileý men laýazymdy qyzmetke salynǵan tyıym óz kúshinde qaldy.
V. Spırınany úsh jylǵa bas bostandyǵynan aıyrý túrindegi negizgi jazadan bosatty.
Úkim zańdy kúshine engen joq.
