ShQO dárigerleri salmaǵy óte az shaqalaqtardyń 65% ómirin saqtap qaldy
ÓSKEMEN. QazAqparat – Shyǵys Qazaqstan oblysynda akýsherlik jáne balalar medıtsınasy sońǵy birneshe jyl boıy qarqyndy damyp keledi, dep habarlaıdy QazAqparat tilshisi.
Shyǵys Qazaqstanda akýsherlik kómek kórsetý júıesin jańǵyrtýdyń biregeı baǵdarlamasy iske qosyldy. Onda tek perzenthanalar men bólimderdi jóndeý jáne jabdyqtaý ǵana emes, ana men bala júıesinde sapaly ózgerister engizý qarastyrylǵan. Sonyń nátıjesinde, salmaǵy az shala týǵan shaqalaqtarǵa kútim jasap, ońaltý sharalaryn júrgizýge barlyq múmkindik jasaldy.
«Buryn salmaǵy 500 gramdyq nárestelerdi qutqarý jáne kútý óte qıyn bolyp sanalǵan. Qazir neonatologtar sábıdiń ómirin saqtap qana qoımaı, oǵan qajetti barlyq jaǵdaıdy jasaı alady. Bul Shyǵys Qazaqstanda shala týǵan shaqalaqtardy ońaltý máselesine kóp kóńil bólinýiniń jemisi. 22-23 aptada dúnıege kelgen nárestelerdiń damýynda qandaı da bir aýytqýlar bolýy múmkin. Sondyqtan olar nevropatolog, oftalmolog, lor, fızıkalyq saýyqtyrý nusqaýshylary syndy túrli mamandardyń baqylaýyna muqtaj», - dep habarlady ShQO Aqparat ortalyǵynan.
Oblystyq Ana men bala ortalyǵynda byltyr salmaǵy 500-den 900 gramǵa deıingi 88 náreste týsa, bıyl olardyń sany tek 8 boldy.
Sondaı-aq ortalyqta mundaı shaqalaqtardyń ómirin saqtap qalý kórsetkishi de ósken. 2018 jyly dárigerler salmaǵy az nárestelerdiń 50 paıyzyn aman alyp qalsa, 2020 jyly bul kórsetkish 65 paıyzǵa jetti.
