ShQO dárigerleri salmaǵy 500 gramm shaqalaqtardy kútip shyǵatyn bolady
ÓSKEMEN. QazAqparat – Shyǵys Qazaqstan oblysynyń perzenthanalarynda salmaǵy 500 gramm shala týǵan nárestelerdi kútip shyǵý múmkin bolady. Bul týraly Shyǵys Qazaqstan oblysynyń ákimi Danıal Ahmetov Qoǵamdyq keńestiń aldynda bergen esebinde aıtty, dep habarlaıdy QazAqparat.
Jıynda óńir basshysy ótken jyly pandemııaǵa qaramastan óńirdiń áleýmettik-ekonomıkalyq damýy oń qarqynyn saqtap qalǵanyn atap ótti.
«Oblysta COVID-19 indetine qarsy halyq densaýlyǵyn saqtaý, syrqattanǵandar sanynyń kúrt ósýine jol bermeý, ınfektsııanyń taralýyn báseńdetý boıynsha jumystardy birinshi orynǵa qoıdyq. Sonyń nátıjesinde qazirgi ýaqytta epıdemıologııalyq jaǵdaı turaqty. Aýrýdyń ortasha ósýi 0,2% quraıdy. Óńirde ýaqtyly jáne sapaly medıtsınalyq kómek kórsetý úshin 41 ınfektsııalyq statsıonar jumys isteıdi, tolyq medıtsınalyq jabdyqtalǵan 6300 tósek-oryn uıymdastyrylǵan», - dep atap ótti ShQO ákimi D. Ahmetov.
Jalpy, ótken jyly óńirdiń densaýlyq saqtaý salasyn damytýǵa barlyǵy 37,3 mlrd teńge bólindi. Qosymsha 174 ÓJJ, 10 rentgen-apparaty, úsh EKMO, úsh kompıýterlik tomograf satyp alyndy.
Óńir basshysynyń aıtýynsha, bıyl medıtsına qyzmetkerleriniń biliktiligin úzdiksiz arttyrý jalǵasady. Ótken jyly ıadrolyq medıtsına, sondaı-aq Altaı men Aıagóz ınsýlt ortalyqtarynyń, Ana men bala medıtsına mekemesiniń janyndaǵy ońaltý bóliminiń dárigerleri oqýdan ótti. Aýyldyq, aýdandyq aýrýhanalarda bosandyrýdyń kúrdeli jaǵdaılarynda jumys isteýge múmkindik berý úshin qyzmet deńgeıin arttyrý josparlanǵan.
«Aýyldyq jerlerde, aýdandarda perınataldyq saladaǵy kórsetkishterdiń tómendigi jáne medıtsınalyq mekemelerdiń jetkiliksiz jabdyqtalýy ózekti másele. Áıelder men jańa týǵan nárestelerge medıtsınalyq kómektiń sapasyn arttyrý jáne qoljetimdilikti qamtamasyz etý maqsatynda úsh aýyldyq aýrýhananyń bosandyrý qyzmetin I deńgeıge, toǵyz aýdanda ekinshi jáne eki aýdanaralyq aýrýhanany I deńgeıge aýystyrý josparlanǵan. Bul bosandyrýdyń neǵurlym kúrdeli jaǵdaılaryn ótkizýge jáne 1500 gramm salmaqpen týǵan sábılerdi kútýge múmkindik beredi. Óskemen jáne Semeı qalalarynyń perzenthanalary bolsa, III deńgeıli jabdyqtarmen qamtamasyz etiledi. Osy eki qalada 500 gramdyq shala týǵan sábılerdi kútýge múmkindik týady», - dedi D. Ahmetov.
Sondaı-aq, Balalar men eresekterge arnalǵan Gematologııa ortalyǵynda medıtsınalyq týrızmdi damytýǵa negiz bolatyn, ıadrolyq medıtsına men robottandyrylǵan hırýrgııany biryńǵaı júıege biriktiretin qýatty medıtsınalyq klaster qurylady.
