ShQO dárigerleri koronavırýstan jazylyp shyqqandardy plazma tapsyrýǵa shaqyrdy
ÓSKEMEN. QazAqparat – Shyǵysqazaqstandyq dárigerler COVID-19 ınfektsııasynan emdelip shyqqan óńir turǵyndaryn ımmýndyq plazma donory bolýǵa shaqyrdy, dep habarlaıdy QazAqparat tilshisi.
Vırýstan jazylǵan adamdardyń plazmasyn naýqastarǵa quıý arqyly ımmýndyq júıeni nyǵaıtýǵa bolady. Bul zerthanalyq jáne klınıkalyq turǵydan dáleldengen.
«COVID-19 ınfektsııasymen aýyrǵandardyń ımmýndyq plazmasy patsıentterge juqpaly dertpen kúresýge kómektesedi. Qan quramynda antıdenesi bar bir adam, kem degende jaǵdaıy aýyr eki naýqastyń ómirin saqtap qala alady. Apparattyq plazmaferezdi tapsyrý qaýipsiz. Eshqandaı aýyrsyný da sezilmeıdi», - dep habarlady ShQO Aqparat ortalyǵy.
KVI-diń ortasha jáne aýyr túrimen aýyryp, odan saýyǵyp shyqqan kez kelgen kámelettik jasqa tolǵan adam donor bola alady. Eń bastysy, aýrýdan aıyqqanyna kem degende eki apta ótse bolǵany. Plazma tapsyryp, dárigerlerge kómek kórsetý úshin jergilikti mekenjaı boıynsha ODA-ǵa baryp, antıdenege test tapsyrý kerek.
«Budan soń oblystyq qan ortalyǵyna baryp, emhanalyq-bıohımııalyq kórsetkish pen qan tobyńyzdy anyqtaýyńyz qajet. Eger saraptama qorytyndysy oń bolsa, plazmaǵa tapsyrýǵa jiberedi. Atalmysh protsedýra úshin 7 AEK nemese 19446 teńge tólenedi. Koronavırýspen aýyrǵan naýqastarǵa qol ushyn bergisi keletin jandar oblystyq Qan ortalyǵyna: 8(7232)70 38 38 nemese 87057520964 telefon nómirleri boıynsha habarlasa alady», - delingen málimette.
