ShQO dárigerleri attan qulap, jambas súıegi synǵan adamǵa kúrdeli ota jasady
Áleýmettik medıtsınalyq saqtandyrý qory ShQO fılıaly baspasóz qyzmetiniń málimetine súıensek, attan qulap túsken 60 jastaǵy óskemendiktiń jambas súıegi synǵan. Osyndaı jaǵdaıda adam tura da, júre de almaıdy, negizgi qan tamyrlary men júıke órimderi qorǵansyz qalady.
Er adam jaraqat alǵannan keıin birden qalalyq aýrýhanalardyń birine jetkizildi. Biraq onda jambas súıekteriniń synyqtaryn emdeıtin maman joq. Sodan soń zardap shegýshi Shyǵys Qazaqstan oblystyq aýrýhanasyna aýystyrylyp, shuǵyl ota jasaldy. Hırýrgter jambas súıekterin anatomııalyq turǵydan durys ornalastyryp, arnaıy buramalarmen bekitti.
«Kúrdeli ota sátti aıaqtaldy. Qazir naýqas ózin birqalypty sezinýde, qajetti terapııadan ótip jatyr. Mundaı aýyr jaraqat alǵan naýqastyń qalpyna kelýine uzaq ýaqyt qajet. Patsıent úıge shyǵarylǵannan keıin de tolyqtaı saýyqqansha tósekten turmaı jatýy tıis», - deıdi oblystyq aýrýhananyń ortopedııa bóliminiń meńgerýshisi Dýman Bakerbekov.
Onyń aıtýynsha, naýqas shamamen eki aıdan keıin ǵana aıaqqa tura alady.