ShQO-dan Qytaıǵa qansha bal eksporttalmaq
ASTANA. QazAqparat - Astanada Shyǵys Qazaqstan oblysynyń aýyl sharýashylyǵy ónimderiniń jármeńkesi ótip jatyr, dep habarlaıdy QazAqparat.
«Bıyl osymen elordada ekinshi ret jármeńke ótkizip jatyrmyz. Birinshi jármeńkede 340 tonna ónim ákelgenbiz, al osy joly 200 mln teńge somasyndaǵy 350 tonnaǵa jýyq túrli aýyl sharýashylyǵy ónimderin jetkizdik. Jalpy jármeńkede saýdaǵa shyǵarylǵan ónim quny Astanadaǵy bazar baǵasynan 20-25 paıyzǵa tómen. Búgin taýarlardyń satylymyna kóńilimiz tolyp otyr, senbiden bastap qala turǵyndary kóptep kelip jatyr», - dedi ShQO aýyl sharýashylyǵy basqarmasynyń azyq-túlik qaýipsizdigi, tamaq jáne qaıta óndeý ónerkásibi bóliminiń basshysy Talǵat Qaımoldınov.
Onyń sózine qaraǵanda, ShQO-da bal ónimderiniń úlesi basymyraq bolǵandyqtan, omarta sharýashylyq ókilderi úlken jármeńkelerge barýǵa erekshe nıet tanytyp otyr.
Budan bólek, ol bal ónimderin sheteldege eksporttaý jaıynda aıtyp berdi. Ótken jyly Qytaıǵa 94 tonna bal ótkizilgen bolsa, bıyl kúzde 1 myń tonna ónimdi shyǵarýǵa kelisim jasalǵan.
«Negizi bizdiń óńirdiń eksporttyq áleýeti 2-2,5 myń tonnaǵa jetedi. Oblysta 4 myń tonna bal ónimderi shyǵarylsa, ishki tutyný kólemi 1,5 tonna deńgeıinde. Sondyqtan jańa jylǵa deıin atalǵan 1 myń tonnany eksporttap jiberemiz», - dedi T. Qaımoldınov.
16-17 qyrkúıek aralyǵynda ótip jatqan jármeńkege Shyǵys Qazaqstan oblysynan jylqy eti, bal, qymyz, kúnbaǵys maıy, sút jáne shujyq ónimderi, balyq pen kókónis jetkizildi. Jalpy óńir aýdandary 100-den astam saýda oryndaryn jasaqtady. ShQO omarta sharýashylyqtary bul jármeńkege 35 tonna bal alyp keldi.
