ShQO-dan 2,6 myń lıtrden astam dızel otynyn zańsyz shyǵarmaq bolǵandardyń joly kesildi
ÓSKEMEN. KAZINFORM – Shyǵys Qazaqstan oblysyndaǵy «Maıqapshaǵaı» keden beketiniń qyzmetkerleri Qytaıǵa 2,6 myń lıtrden astam dızel otynyn zańsyz alyp ótpek bolǵandardyń jolyn kesti.
ShQO boıynsha memlekettik kirister departamentiniń málimetinshe, zańbuzýshylyq memlekettik shekara arqyly ótip bara jatqan Qytaı Halyq Respýblıkasynyń azamattary basqarǵan tórt júk kóligin tekserý barysynda anyqtalǵan.
– Tekserý kezinde kólikterden arnaıy jasalǵan qosymsha janarmaı baktary tabyldy. Zańsyz áketilmek bolǵan dızel otynynyń jalpy kólemi shamamen 2 640 lıtrdi qurady, – delingen aqparatta.
Jasyryn túrde janarmaı tasymaldaý qoldanystaǵy zańnamaǵa qaıshy. Osyǵan baılanysty tórt júrgizýshiniń árqaısysyna qatysty QR Ákimshilik quqyq buzýshylyq týraly Kodeksiniń 590-baby 7-bóligi boıynsha ákimshilik materıaldar rásimdeldi. Árqaısysyna 32 myń teńge kóleminde aıyppul salyndy.
Sonymen qatar tekserý materıaldary protsessýaldyq sheshim qabyldaý úshin Shyǵys Qazaqstan oblysy boıynsha ekonomıkalyq tergep-tekserý departamentine joldandy.
– Janar-jaǵarmaı materıaldaryn zańsyz áketý áreketteriniń jolyn kesý boıynsha jumystar kúsheıtilgen rejımde jalǵasýda. Bul sharalar ishki naryqty qorǵaýǵa jáne memlekettiń ekonomıkalyq múddelerin qamtamasyz etýge baǵyttalǵan, – delingen habarlamada.
Eske salsaq, osyǵan deıin Qazaqstannan janarmaıdy zańsyz shyǵarýdyń 392 deregi anyqtalǵany habarlanǵan.
