ShQO: dalaly aýmaqtan kún saıyn 10-nan astam órt shyǵyp tur

ÓSKEMEN. KAZINFORM – Shyǵys Qazaqstan oblysynda kún saıyn 10-nan astam dala órti tirkelýde. 

ShQO Tótenshe jaǵdaılar departamenti baspasóz qyzmetiniń málimetine súıensek, óńirde órt qaýpi joǵary maýsym bastalǵaly qutqarýshylar kúsheıtilgen rejımde jumys isteýde. Kúnine shamamen 10-15 ret dala órti tirkeledi.

«Jaǵdaıdy turaqtandyrý jáne turǵyndarǵa órt qaýipsizdigi erejelerin túsindirý úshin mamandar men eriktiler jıi ot shyǵatyn saıajaılarǵa profılaktıkalyq reıdke shyqty. Halyqqa jazda aýmaqtarda qaýipsizdikti qalaı qamtamasyz etý kerektigi túsindirildi. Qutqarýshylar drondy da paıdalanýda. Sonyń arqasynda 200 metrge deıingi bıiktiktegi órtti jyldam anyqtaýǵa bolady», - delingen aqparatta.

Reıd nátıjesinde órt qaýipsizdigi erejelerin buzǵan 1 adam QR ÁQBtK-niń 410-baby boıynsha ákimshilik jaýapkershilikke tartyldy.

«Basty mindetimiz – iri órtterdiń, adam shyǵynynyń aldyn alý. Keıde azamattar saıajaıdaǵy kórshisiniń ot jaǵýynan zardap shegedi. Sol úshin biz órttiń qanshalyqty qaýipti ekenin jáne qaýipsizdik sharalaryn qalaı saqtaý kerektigin túsindirýdemiz», - deıdi departamenttiń memlekettik órt baqylaý basqarmasynyń bastyǵy Nurjan Ómirjanov.