ShQO-daǵy jylyjaıda tropıkalyq jemister ósiriledi
ASTANA. QazAqparat - Qysy-jazy jaıqalyp turatyn baq nemese tropıkalyq djýnglı. Shyǵys Qazaqstandaǵy Ýkraınka aýylynda ornalasqan jylyjaıdy dál osylaı ataýǵa bolady. Tańǵajaıyp ósimdikter álemin óz kózimen kórýge yqylasy aýǵandar qatary kún sanap artyp keledi, dep habarlaıdy Habar 24 telearnasy.
Hobbıdi bızneske aınaldyra bilý de óner. Sanaly ǵumyrynda ınjener-tehnık qyzmetin atqarǵan Lıýdmıla Zemlıanaıa zeınet jasyna jetkende ómiriniń jańa belesine qadam basty. Osydan 9 jyl buryn jylyjaı ashyp, tropıkalyq jáne sýbtropıkalyq daqyldardy ósirýge den qoıady.
Eńbegi nátıjesiz emes. Oıyndaǵy ósimdikteri ósip, tańǵajaıyp baqqa aınaldy. Endi túrli ósimdikterdi kórý úshin turǵyndarǵa shetelge barýdyń qajeti joq. Ýkraınka aýylyna kelse bolǵany.
«Ósimdikter óte beıimdelgish keledi. Bastysy laıyq jaǵdaı jasaý. Bári de klassıkalyq úlgi boıynsha jaryq berý, sýarý jáne qorektendirý boldy. Mysaly men lımondy jaqsy kóremin. Onyń kútimi de ońaı. Qysta jaryqty az berý kerek. Kútim bolsa ónim de kóp alýǵa bolady. Al tógilgen gúl men hosh ıis janǵa jaılylyq beredi», deıdi jylyjaı ıesi Lıýdmıla Zemlıanaıa.
Jylyjaıda ósimdiktiń 500-ge jýyq túri bar. Árqaısysyna erekshe kútim men qamqorlyq qajet. Mahabbatqa bólengen jemister ónimdi mol beredi. Kópshilikti tánti etken alyp lımondar men kishkentaı banandardy tamashalaýshylar elimizdiń túkpir-túkpirinen keledi eken.
Jalpy aýmaǵy myń sharshy metrdi quraıtyn keshen tórt toptan turady. Óńir natýralısteri men florısteri de jylyjaıdyń turaqty meımandaryna aınalǵan. Ǵylymı jumystar boıynsha kelisim jasaý úshin elimizdiń ózge óńirlerinen de mamandar keledi eken.
«Tropıkalyq ósimdikter bar, lımon ósiriledi, aýylsharýashylyq daqyldary da ósirilip jatyr eken. Solardyń bárin kórdik. Endi stýdentterimizdi jylyjaıǵa ákelip, jumys jasap, baılanysta bolsaq degen josparymyz bar», - deıdi bıologııa kafedrasynyń meńgerýshisi Aınash Kitapbaeva.
FOTO: yk-news.kz
