ShQO-daǵy jumyspen qamtý mekemeleri halyqqa jalǵan aqparat berip kelgen

ASTANA. QazAqparat - Shyǵys Qazaqstan oblysynyń prokýratýrasy jumyspen qamtý organdarynyń múmkindigi shekteýli jandardy jumysqa ornalastyrýda jalǵan aqparat berip kelgendigin áshkereledi, dep habarlaıdy QazAqparat altaynews.kz saıtyna silteme jasap.

Qadaǵalaý organy múmkindigi shekteýli jandardyń quqyqtarynyń saqtalýyna taldaý júrgizgen kezde olardy jumysqa ornalastyrý máselesi túbegeıli sheshim tappaǵanyn anyqtady.

Máselen, oblystyq jumyspen qamtý jáne áleýmettik baǵdarlamalardy úılestirý basqarmasy bergen aqparatqa sáıkes, aqyrǵy tórt jyldyń ishinde jumyspen qamtý oryndaryna 4016 erekshe jannan ótinish túsken, olardyń 2241-i (55 paıyzdan astamy) jumyspen qamtylǵan.

Alaıda tekseris barysynda kórsetkishter meılinshe arttyrylǵany belgili boldy. Bir múgedektiń jumysqa ornalasýy birneshe adamnyń jumysqa turýy retinde esepke enip otyrǵan.

Jyl saıyn shamamen 1200-den astam múgedek jumysqa muqtaj bolsa, bekitilgen kvota arqyly onyń tek 10 paıyzy (138-i) ǵana eńbekpen qamtylǵan.

Atap óteıik, sońǵy tórt jylda 435 jarymjan jan jumysqa óz betimen ornalasqan.
Zań boıynsha jumys berýshiler jumyspen qamtý organdaryna ár toqsan saıyn múmkindigi shekteýli jandardy eńbekke qabyldaǵandary jóninde habarlaýy qajet. Biraq is júzinde jumys berýshilerdiń 70 paıyzy (386 kásiporynnyń 271-i) eshqandaı málimet usynbaıdy.

Al jumyspen qamtý organdary zań talaptarynyń buzylǵanyn kóre tura, atalǵan jaıttar boıynsha eńbek ınspektsııasyna shaǵymdanbaǵan. Sol sebepti de tórt jyldyń ishinde bir de bir jumys berýshi ákimshilik jaýapkershilikke tartylmaǵan.

Prokýratýra qyzmetkerleri eńbek quqyǵy buzylǵan jaǵdaıda múmkindigi shekteýli jandar qadaǵalaý organynyń  8 (7232) 243299 senim telefonyna habarlasa alatynyn eske salady.