ShQO-daǵy jer úılerde órt qaýipsizdigin buzýdyń 27 myńǵa jýyq faktisi anyqtaldy

ÓSKEMEN. QazAqparat – Shyǵys Qazaqstan oblysynda bıyl jer úılerde órt qaýipsizdigin buzýdyń 27 myńǵa jýyq faktisi anyqtaldy, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, jyl basynan beri qutqarýshylar jer úılerdi aralap, 200 000-nan astam nusqaýlyq júrgizdi. Sonyń barysynda órt qaýipsizdigi erejelerin buzýdyń 27 000-ǵa jýyq faktisi anyqtaldy.

«Onyń 13000-nan astamy peshti paıdalaný kezinde órt qaýipsizdigi erejelerin saqtamaýǵa, 9000-nan astamy elektr jabdyqtaryn qoldanǵanda qaýipsizdik talaptarynyń buzylýyna baılanysty bolyp otyr. TJD mamandarynyń ýaqtyly júrgizilgen aldyn alý sharalarynyń arqasynda búginde turǵyndar 5000-nan astam buzýshylyqty joıdy. Úı ıelerine peshti jylytý jáne elektr aspaptaryn paıdalaný erejeleri boıynsha egjeı-tegjeıli nusqaýlyqtar ótkizildi», - delingen aqparatta.

Reıdterden bólek, qutqarýshylar áleýmettik osal sanattaǵy otbasylardyń úılerine órt shyqqanyn habarlaıtyn datchıkterdi ornatýda. Qazirgi ýaqytta 2000-nan astam úıge osyndaı qurylǵy ornatylǵan.

Aıta keteıik, 2022 jyldyń basynan beri oblys boıynsha jer úılerde 744 órt shyqqan. Al 2021 jyldyń osy kezeńinde 782 ret órt boldy.