ShQO-daǵy jastardyń bastamalaryna qoldaý kórsetilýde
«Ulaǵat» jastar qoǵamdyq birlestiginiń maqsaty – jas býynǵa jan jaqty kómek kórsetý, túrli bastamalaryna qoldaý tanytý. Birlestiktiń tóraǵasyAıaýjan Ashımovanyń aıtýynsha, jastarǵa san alýan trenıngter, semınarlar uıymdastyrylyp, ıdeıalaryn júzege asyrýǵa baǵyt-baǵdar berilýde.
«Shyǵys Qazaqstannyń klımaty qubylmaly, aýyr ekendigi barshaǵa aıan. Qysta alaı-dúleı boran soqsa, kóktemde sý tasqyny tyǵyryqqa tireıdi, al jaz shyqqanda órt órshıdi. Osyndaı kezde qıyn jaǵdaıǵa tap bolǵan azamattarǵa qoldaý kórsetý úshin byltyrdan bastap arnaıy jobany qolǵa aldyq. Sonyń aıasynda aýyl turǵyndaryna, jastarǵa volonterlikti nasıhattap, qalaı áreket etý kerektigin úırettik. Endi olar óz jerlesterine kómektesedi», - deıdi ol.
Aıaýjan Ashımovanyń sózinshe, volonterlik kýrstan ótken adamdardyń tizimi jasalyp, jergilikti ákimdikke berilgen. Qandaı da bir oqys oqıǵa nemese tótenshe jaǵdaı bolyp jatsa, osy azamattar jumyldyrylady. Eń aldymen eriktilerdiń ózderiniń densaýlyǵyna zııan kelmeıtindeı jaǵdaı jasalýy tıis.
«Bul kýrstar ShQO-daǵy 600-den astam aýylda júrgizildi. Mobıldi qosymsha ázirlengen. Onda TJ kezinde áreket etý algorıtmi bastan-aıaq kórsetilgen», - dedi ol.
