ShQO-daǵy ulttyq park aýmaǵynda qar barysy fototuzaqqa túsip qaldy
ÓSKEMEN. QazAqparat – Shyǵys Qazaqstan oblysyndaǵy Katonqaraǵaı ulttyq parkinde qar barysy fototuzaqqa túsip qaldy, dep habarlaıdy QazAqparat tilshisi.
Katonqaraǵaı memlekettik ulttyq tabıǵı parki aýmaǵynda qar barysy fototuzaqqa túsip qalǵan. Ulttyq park qyzmetkerleri fotony jarııalady. Munda qar barysy fototuzaq obektıvine birinshi ret iligip otyrǵan joq.
«Qar barysy sany azaıyp bara jatqan jyrtqysh retinde Qazaqstannyń Qyzyl kitabyna engizilgen. Ol Qazaqstannan basqa Qytaı, Mońǵolııa, Úndistan, Nepal, Qyrǵyzstan, Pákistan, Tájikstan, Reseı, Aýǵanstan, Býtan, Ózbekstanda kezdesedi. Jer betindegi barystardyń jalpy sany 4000-nan 6000-ǵa deıingi aralyqta», - delingen aqparatta.
Aıta keteıik, Katonqaraǵaı memlekettik ulttyq tabıǵı parki 2001 jyly qurylǵan. Ol elimizdegi eń iri jáne erekshe qorǵalatyn tabıǵı aýmaq.
Munda Kókkól sarqyramasy, «Rahman qaınarlary» jylý kózderi, Berel qorǵandary, Uly Jibek jolynyń soltústik tarmaǵy jáne 643 myń gektardan astam ásem tabıǵat aýmaǵynda shoǵyrlanǵan basqa da kóptegen kórikti jerler bar.
