ShQO-daǵy tótenshe jaǵdaı: Ákimmen kezdesken turǵyndar ne deıdi
ÓSKEMEN. QazAqparat - Sońǵy 3 táýlik ishinde oblys boıynsha 220-dan astam úıdi sý basqan, dep habarlaıdy QazAqparat tilshisi.
Oblystyń ákimi Danıal Ahmetov tasqynnyń ekinshi tolqynynan eń kóp zardap shekken Glýboke aýdanyna túndeletip bardy. Mundaǵy Glýbochanka ózeni arnasynan asyp, birneshe eldi meken sý astynda qalǵan. Aýdan ortalyǵy Glýbokoe kentiniń ózinde 29 úıge sý kirgen eken.
Eske sala ketsek, Glýbokoe aýdanynda tótenshe jaǵdaı jarııalanǵan edi.
«Sý keshe tańerteń jaıyla bastady. Tótenshe jaǵdaı mamandary shlak tókti. Sony qaptap, sýdyń jolyna tosqanbyz, nátıje bolmady. Qorajaıymyz ben qudyǵymyz sý astynda qaldy. Aýyzsýdy bıikte ornalasqan úılerden alyp otyrmyz. Sý jertóleden bir-aq shyqty. Úıdiń irgesine áýeli polıetılen tósep, onyń betine qumqap jınaǵanbyz. Ony jasamaǵan úılerge qyzyl asyqtan sý kirdi» - deıdi úıin sý basqan turǵandardyń biri Qazıma Qasenova.
Úılerge kirgen sýdyń betin qaıtarý úshin kópirdiń bir jaǵyn jyryp, aǵys keptelgen tusty keńeıtý kerek degen sheshim qabyldanypty. Danıal Ahmetov ol jumystyń tıimsiz uıymdastyrylǵanyn synǵa aldy.
«Qaýqarsyz tehnıkamen joldy jyryp bolǵansha qansha ýaqyt ketetinin aıtýdyń ózi qıyn. Myna eki tehnıkanyń ornyna úlken ekskavator qoıǵanda jumys 10 ese jyldam júrýshi edi. Osynyń bárin baspen oılap isteý kerek bolǵan. Túnde myna tehnıkalardyń ornyna 2 úlken ekskovator ákelinetin bolsyn» - dedi ol.
Úıine kire almaı qalsa da, oblys ákiminiń keletinin estip, kóshede sabylyp júrgen turǵyndar talap-tilekteri men shaǵymdaryn aıtty. Olardyń aıtýynsha tasqyn bastalǵan sátte-aq turǵyndar kópirdiń shetin jyryp, arnany keńeıtýdi usynǵan eken.
Oblys ákimi úıi búlingen turǵyndardyń eshqaısysy ótemaqysyz qalmaıtynyn aıtty.
«Glýbochanka ózeni arnasyna syımaı ketip, osyndaı jaǵdaı bolyp otyr. 2 kúnniń ishinde arnaıy komıssııa barlyq sý alǵan úılerdi tekseredi. Kirý múmkin emes bolǵan úılerdiń máselesi sý qaıtqan soń qaralady. Sol tekserýler nátıjesinde turýǵa jaramsyz bolǵan úı ıelerine basqa úı nemese páter beriledi. Búlingen úıler jóndeledi» - dedi Danıal Ahmetov.
Jalpy aýdan boıynsha sý alǵan úılerdiń sany 163-ke jetip otyr. Olardan 566 adam qaýipsiz jerge kóshirilgen. Áleýmettik nysandar bazasynda qurylǵan ýaqytsha baspanalardy solardyń tek 60-y ǵana panalaýda. Qalǵandary týysqandarynyń úıine ornalasypty.
Aımaq basshysy O.Bókeı atyndaǵy mektepke ýaqytsha kóshirilgen turǵyndardyń hal-jaǵdaıyn bildi. Munda 6 bala, 6 eresek adam ornalastyrylypty. Mektep dırektory sport zalǵa taǵy 150 adam qabyldaýǵa bolatynyn aıtady.
«Eń birinshi osy Marfýǵa Shekerbaı ekeýimizdiń úıimizdi sý basty. Mektep dırektoryna kórsetip jatqan kómegi úshin rahmet. «Nur Otan» partııasynyń atynan Ánýarbek Muqtarhanov degen azamat kelip, jaǵdaıymyzdy bilip ketti» - dedi Gúlmıra Qalıeva.
Oblys basshysy mundaǵy adamdarǵa da úı qulasa ornyna baspana beriletinin, qırap-búlingen múliktiń barlyǵyna ótemaqy tólenetinin taǵy da basa aıtty.
Danıal Ahmetovtyń aıtýynsha sońǵy 3 táýlikte Glýbokoe aýdanynan bólek Óskemen qalasynda 60 úıdi, Katonqaraǵaı aýdanynda 4 úıdi sý alǵan.
«Eki kúnniń ishinde 78 mıllımetr jańbyr jaýǵan. Bul úsh aıdyń mólsherinen asady. Glýbokoe aýdanynda sý alǵan aýyldar da, Óskemenniń shetindegi jeke sektorlar da shuńqyrly jerde ornalasqan. Mezgilsiz jaýyn jibip úlgermegen tońnyń betimen úılerge jaıylyp otyr. Buǵan deıin Aıagózdegi tasqynnan zardap shekken otbasylarǵa barlyǵy 189 mln teńge bólindi. Al Óskemendegi tasqynnyń saldaryn joıýǵa qala bıýdjetinen qarjy jumsalýda. Glýobokoe aýdanyndaǵy sý basqan úılerdiń teń jartysy tekserildi. Qalǵanyn 2 kúnniń ishinde qarap shyǵady. Sonyń nátıjesi boıynsha tıisti kózderden qarjy bólinedi» - dedi ákim.
