ShQO-daǵy tasjol boıynda 5 jarylys jasalyp, qar kóshkini túsirildi
ÓSKEMEN. QazAqparat – Shyǵys Qazaqstan oblysynda jasandy jolmen qar kóshkini túsirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, qar kóshkininiń aldyn alý sharalary «Óskemen-Samar» tasjolynda júrgizildi.
«Qutqarýshylar men «Qazseldenqorǵaý» ShQ fılıalynyń mamandary atalǵan tasjoldyń 95-102 shaqyrymynda jasandy jolmen qar kóshkinin túsirdi. 5 jarylys jasalyp, sonyń nátıjesinde jalpy kólemi 4380 tekshe metr qar túsken», - delingen aqparatta.
Búginde kún saıyn kóshkin júrý qaýpi bar jerlerge monıtorıng júrgizilýde. Mamandar azamattarǵa daýyldy eskertýlerge nazar aýdaryp, kóshkin júrýi múmkin taýly jerlerge barmaý qajettigin eskertti.
Aıta keteıik, qys bastalǵaly beri óńir boıynsha 90 ret jasandy jolmen qar kóshkini túsirilgen.
