ShQO-daǵy tasymaldaýshy kompanııa jumysshylaryna 6,2 mln teńge qaryz

ÓSKEMEN. QazAqparat – Shyǵys Qazaqstan oblysynda jolaýshy tasymaldaıtyn kompanııa - «Semey Bus» JShS-ǵa jospardan tys tekseris júrgizilip, 72 zańbuzýshylyq anyqtaldy, dep habarlaıdy QazAqparat tilshisi.

ShQO Óńirlik kommýnıkatsııalar qyzmetinde ótken brıfıng barysynda oblystyq Memlekettik eńbek ınspektsııasy basqarmasy basshysynyń orynbasary Qaırat Ábilqaıyrov júrgizilgen tekserýdiń qorytyndysyn aıtty.

«Tekserý barysynda Eńbek kodeksin buzýdyń 72 faktisi anyqtaldy. Nátıjesinde atalǵan JShS eńbekaqynyń ár keshiktirilgen kúni úshin jumysshylarǵa 4 522 887 teńge kóleminde ósimpul, eńbekke ýaqytsha jaramsyzdyq boıynsha 41 760 teńge járdemaqy, paıdalanylmaǵan eńbek demalysy úshin 830 841 teńge ótemaqy, 2019 jyldyń qazanynan 2020 jyldyń maýsymyna deıingi kezeńdegi jalaqy bereshegi (43 adam) 878 651 teńge jáne ústeme jumys, mereke men demalys kúnderine aqy tóleýge mindetteldi», - deıdi ol.

Osylaısha, «Semey Bus» JShS-niń jumysshylar aldyndaǵy jalpy qaryzy 6 274 139 teńgeni quraıdy.

Memlekettik eńbek ınspektorlary zańbuzýshylyqtardy 2020 jyldyń 31 tamyzyna deıin joıý týraly nusqama berdi. Budan bólek, zańdy tulǵaǵa 120 AEK (333 360 tenge) mólsherinde ákimshilik aıyppul salyndy.