ShQO-daǵy tasqyn: Qutqarýshylar demalyssyz jumys jasaýda
ÓSKEMEN. QazAqparat - Shyǵys Qazaqstan oblysy Zyrıan aýdanynyń kónekóz qarııalary mundaı sý tasqynyn birinshi ret kórip otyrǵandaryn aıtady, dep habarlaıdy QazAqparat tilshisi.
Zyrıan aýdanynyń halqyn ábigerge salǵan ózenniń biri - Starýshka. Ózen arnasynan asyp, aınalma kanaldy janaı ótip, aýdan ortalyǵyndaǵy úılerdi sý astynda qaldyrǵan bolatyn.
«Apat saldaryn joıýǵa jumyldyrylǵan áskerıler men qutqarýshylar «demalys» degen uǵymdy umytyp, táýliktik jumysqa kóshkenine birneshe kún boldy. Barlyq garnızondar táýlik aralatyp kezekshilikke túsip júr. Sý alǵan 9 aýyldyń biri - Maleevte de osyǵan uqsas jaǵdaı kórinis alǵan. Toń betimen tasyǵan seń 7 metrlik dambydan asyp, 102 úıdi basyp qaldy. Aýyldyń kónekózderi mundaı apatty týǵaly kórmegenderin aıtýda. Qutqarýshylar tasqyn saldarymen kúresip qana qoımaı, muz keptelgen tustarda birneshe jarylystar da uıymdastyrdy» - deıdi oblystyq tótenshe jaǵdaılar departamentiniń baspasóz bóliminiń basshysy Anastasııa Sklıar.
