ShQO-daǵy tasqyn: Qala ortasynda 2 mln tekshe metr sý jatyr
ÓSKEMEN. Qala ortasynda 2 mln tekshe metr sý jatyr. Bul týraly aımaq basshysy Danıal Ahmetov Zyrıan aýdanyna jasaǵan sapary barysynda aıtty, dep habarlaıdy QazAqparat tilshisi.
Búgin kezekti ret Zyrıan aýdanyna at basyn burǵan Danıal Ahmetov mundaǵy toǵyz eldi mekende sýdyń beti qaıtqanyn kórdi. Aýdanda apatqa ushyraǵan 414 úıdiń, 285-inen sý ketip, 129-ynda tıisti jumystar júrgizilýde.
Zyrıan qalasynyń eski bóliginde áli kúnge deıin 74 úı sý astynda tur. Oblys ákimi olardyń bári turýǵa jaramsyz dep tanylýy yqtımal ekenin jetkizdi. Sý deńgeıi 3 metrge jetken ýchaskelerge búgin qosymsha sý sorǵysh nasostar qoıylmaq.
«Bul jerde 2 mln.tekshe metrge deıin sý jatyr. Olardy sorý úshin óte qýatty tehnıkalar qajet. Búgin taǵy eki nasos qosamyz. Olar saǵatyna eki myń tekshe metrge deıin sý sorýǵa qabiletti», - dedi Danıal Ahmetov.
Ýaqtysha baspanalarda jatqan turǵyndarmen kezdesken oblys ákimi eshbir turǵyn baspanasyz qalmaıtynyn aıtty.
«Barlyq turǵyndardyń shyǵynyn arnaıy komıssııa esepteıdi. Qazir qalada 60 páterli jańa turǵyn úıdiń qurylysy júrip jatyr. Sonymen qatar, ekinshi deńgeıli naryqta satylymǵa qoıylǵan baspanalardyń esebi daıyndalýda. Dúısenbige deıin úı máselesin sheshý joly naqty belgili bolady», - dedi aımaq basshysy.
Onyń aıtýynsha, endi Katonqaraǵaı aýdanyndaǵy Sennoe eldi mekeni muz keptelisinen zardap shegýi múmkin. Oblystyq tótenshe jaǵdaılar departamentine ondaǵy muz jarý jumystaryn erteń bastaý tapsyryldy.
