ShQO-daǵy tasqyn: Glýbokoe aýdanyna Ulttyq ulan jasaqtary jiberildi
ÓSKEMEN. QazAqparat - Glýbokoe aýdanyndaǵy tasqynnyń saldaryn joıýǵa Ulttyq ulannyń 60 sarbazy jiberildi, dep habarlaıdy QazAqparat tilshisi.
Shyǵystaǵy tasqynmen kúreske Qazaqstan Respýblıkasynyń Ulttyq ulan jasaqtary da belsendi atsalysýda.
«Shyǵys» óńirlik qolbasshylyǵynyń 5518 áskerı bólimine qarasty jedel maqsattaǵy batalony kóktemgi tasqyn saldaryn joıýǵa tas-túıin daıyndyqpen kiristi. Buǵan deıin sarbazdar bekinis qural-saımandaryn arqalap, Óskemendegi tasqynmen kúreske atsalysqan bolatyn» - deıdi «Shyǵys» óńirlik qolbasshylyǵy shtab bastyǵynyń tótenshe jaǵdaılar jónindegi orynbasary Baýyrjan Bilálov.
Qazirgi tańda Ulttyq ulan sarbazdary Glýbokoe aýdanynyń turǵyndaryna kómektesip júr. Olardyń kúshimen Progres, Predgornoe aýyldarynan jáne Beloýsovka kentinen 10 otbasy qaýipsiz jerge kóshirildi.
«Bizdiń sarbazdar qutqarǵan 21 adamnyń ishinde 6 bala, 1 jarymjan adam boldy. Sarbazdar ózge de qyzmettermen birge tań atqannan tún ortasyna deıin damylsyz qımyldaýda. Tasyǵan sýdyń beti qaıtyp, jaǵdaı turaqtalǵansha halyqpen birge bolamyz» - deıdi Baýyrjan Bilálov.
Ulttyq ulan jasaqtary aryqtardy arshyp, bóget úıip qana qoımaı, aýyz sýsyz qalǵan úılerge sý tasyp berip júr. Dúkenge barý múmkin bolmaı qalǵan úıler azyq-túlik alǵyzý úshin de sarbazdardyń kómegine júginýde.
Baýyrjan Bilálovtyń aıtýynsha, Ulttyq ulan ókilderi ár eldi mekende 200 metrden astam aryq qazyp, júzdegen qap ınertti materıal tósep, tótenshe jaǵdaı qyzmetiniń jumysyn jeńildetýde.
