ShQO-daǵy «Taskesken-Baqty» tasjoly jabyldy
ÓSKEMEN. QazAqparat – Shyǵys Qazaqstan oblysynda «Taskesken-Baqty» tasjoly jabyldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, búgin óńirdegi tasjoldardyń birinde kólik quraldarynyń barlyq túri úshin qozǵalysqa tyıym salyndy.
«Aýa temperatýrasynyń kúrt jylynýy men qardyń tez erýine baılanysty respýblıkalyq mańyzy bar «Taskesken-Baqty» tasjolynyń 75-84 shaqyrymy jabyldy», - delingen aqparatta.
Osy rette, qutqarýshylar óńir jurtshylyǵyna alys saparǵa shyǵar aldynda joldardyń jaı-kúıin «Dármen» mobıldi qosymshasy arqyly tekserip otyrýǵa keńes berdi.
