ShQO-daǵy «Tarbaǵataı» ulttyq parki saıabaqtar sherýin ótkizdi
ÚRJAR. QazAqparat - Shyǵys Qazaqstan oblysy Úrjar aýdanynda ótken jyly qurylǵan «Tarbaǵataı» memlekettik ulttyq parki jergilikti turǵyndarǵa týǵan jerdiń tabıǵatyn aıalap-qorǵaýǵa, qoryqtyń gúldenýine úles qosý maqsatynda qolǵa alynǵan «Saıabaqtar sherýin» ótkizdi, dep habarlaıdy QazAqparat tilshisi.
Іs-shara barysynda Abylaı han dańǵyly boıymen orman sheberleri, sport mektebiniń ujymy, aýdannyń belsendi jastary men «Tarbaǵataı» memlekettik ulttyq tabıǵı parkiniń jańa avtokólikteri sherýmen júrip ótti.
«Táýelsizdik» alańynda ótken aktsııanyń ashylýynda sóz sóılegen aýdan ákiminiń orynbasary Serikqazy Sádýaqasov ekonomıka damyǵan saıyn qorshaǵan ortany qorǵaý qıynǵa soǵyp bara jatqanyn jetkizdi. Onyń aıtýynsha, osydan bir jarym ǵasyrdan astam ýaqyt buryn amerıkalyq tabıǵat janashyrlary aldymen «Jer kúni», «Aǵashtar kúni» dep atalǵan, dúnıejúzi elderiniń dástúrine engizgen tabıǵat baılyqtaryn qorǵaý sharasy elimizde 1996 jyldan beri atap ótile bastaǵan.
«Búginde dúnıejúzinde «Parkter sherýi» degen ataýǵa ıe bolǵan shara halyqtyń nazaryn tabıǵattyń problemalaryna aýdarý, halyqtyń tabıǵat baılyqtaryn qorǵap, ekologııalyq bilimderin jetildirýge arnalǵan. Aýdan kóleminde «Parkter sherýi» aktsııasy jyl saıyn ótkizilýi dástúrge aınalǵan. Oǵan aýdanymyzdyń barlyq eldi mekenderinen qatysyp, aktsııa barysynda kóshet otyrǵyzý, senbilikter ótkizý jáne taǵy da basqa sharalar uıymdastyrylýda. Bıylǵy aıtýly shara Nur Otan partııasy aýdandyq fılıalynyń tóraǵasy S.Zaınýldınniń bastamasymen mektepter men «Tarbaǵataı» memlekettik ulttyq parkiniń jáne belsendi jastarymen birge ótkizilýde», - dedi aýdan ákiminiń orynbasary Serikqazy Sádýaqasov.
«Tarbaǵataı» memlekettik ulttyq tabıǵı parkiniń dırektory Álibek Toqymtaev aktsııanyń ashylýymen quttyqtap, tabıǵatty qorǵaýǵa shaqyrdy.
Tabıǵat qorǵaý aktsııasyn qorytyndylaý barysynda Mádenıet úıiniń ónerpazdary tabıǵat taqyrybynda án shyrqasa, parktiń qyzdary flesh-mob ótkizip, bı bıledi.
Aıta keteıik, «Saıabaqtar sherýi» barysynda memlekettik ınspektorlar, orman sheberleri, mektep oqýshylary men aýdan jastary Naýaly aýylyna 300-ge jýyq kóshet otyrǵyzdy.
