ShQO-daǵy taǵy bir qalada jaz boıy ystyq sý bolmaıdy

ÓSKEMEN. QazAqparat – Shyǵys Qazaqstan oblysyndaǵy Altaı qalasynda jaz boıy ystyq sý bolmaıdy, dep habarlaıdy QazAqparat tilshisi.

Altaı aýdany ákimdiginiń málimetine súıensek, qala boıynsha jylytý maýsymy 5 mamyr kúni aıaqtalǵan. Endi jylý jelilerine jóndeý jumystarynyń júrgizilýine baılanysty jaz boıy turǵyndar ystyq sýsyz otyrady.

«1 maýsymnan bastap úılerde ystyq sý bolmaıdy. Sol kezde qazandyqtar tolyq óshiriledi. Jospar boıynsha ystyq sý yrkúıek aıynda qosylady. Osy ýaqyt aralyǵynda qazandyqta, jylý jelilerinde josparly jóndeý-qalpyna keltirý jumystary júrgiziledi», - delingen aqparatta.

Eske salsaq, keshe Shyǵys Qazaqstan oblysy Rıdder qalasynda jylý elektr ortalyǵyndaǵy jóndeý jumystaryna baılanysty turǵyndar jaz boıy ystyq sýsyz otyratyndyǵyn habarlaǵan edik.