ShQO-daǵy tabıǵı qoryqta 100 gektarǵa jaıylǵan órttiń beti qaıtpaı jatyr
ÓSKEMEN. QazAqparat – Shyǵys Qazaqstan oblysy Kókpekti aýdanynda órt sóndirýshiler «Qulynjon» memlekettik tabıǵı qoryǵyndaǵy 100 gektarǵa jaıylǵan qyzyl jalynmen kúresip jatyr, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń dereginshe, «Qulynjon» memlekettik tabıǵı qoryǵynda buta men shóp órtengen. Qatty jeldiń saldarynan tilsiz jaý lezde jan-jaqqa jaıylyp ketti.
«Qazirgi ýaqytta órt sóndirýshiler sol jerde jalynmen kúresip jatyr. Aldyn ala málimet boıynsha ot 100 gektar aýmaqty sharpyǵan. Órtti aýyzdyqtaýǵa qutqarýshylar, jergilikti atqarýshy organ ókilderi men ormanshylar tartyldy. Barlyǵy 50 adam men 9 tehnıka jumyldyrylǵan»
, - dep habarlady vedomstvo ókilderi.
Budan bólek, Ulan aýdanyndaǵy Asýbulaq orman sharýashylyǵynda da órt shyqqan. Jalpy aýdany 50 gektarǵa jetken qyzyl jalyndy óshirýge 149 adam men 2 tikushaq tartyldy.
Esterińizge sala ketsek, osyǵan deıin Shyǵys Qazaqstanda bir kúnde 26 dala órti tirkelgenin habarlaǵan edik.
