ShQO-daǵy sý tasqyny: Zyrıan aýdanynyń turǵyndary jóndelgen úılerine kirip jatyr
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov Zyrıan aýdanyndaǵy sý tasqynynan zardap shekken úılerdiń turǵyndarymen kezdesti, dep habarlaıdy QazAqparat tilshisi.
Kóktemgi tasqyn aýdanda barlyǵy 414 úıdi alyp, 192 aýlany búldirgen bolatyn. Sý alǵan úılerdi qalpyna keltirý jumystary sáýir aıynda bastalǵan.
Osy aralyqta jóndeýge jatatyn úılerdiń barlyǵy jańasha kelbetpen qoldanysqa berilip, turǵyndar óz úılerine kire bastady. Ákim jolyqqan turǵyndardyń barlyǵy jóndeý jumystarynyń sapasyna kóńilderi tolatynyn aıtyp jatty.
«Úıimizdi óz kúshimizben qalpyna keltire almaıtynymyz anyq edi. Eń bastysy apatpen bet-bet kelgende qasymyzda memleket ókilderi boldy. Udaıy halimizdi surap, muqtajdyqtarmyzdy bilip otyrdy. Eriktiler de, qarapaıym adamdar da kómek qolyn sozyp jatty. Úıimiz burynǵydan jańalana túsken sııaqty» - deıdi Elena Chıgıntseva esimdi turǵyn.
Al Oksana Koprıkova esimdi turǵynnyń baspanasy múlde jaramsyz kúıge túsken eken. Qazir ol jańadan berilgen páterde turyp jatyr. Kórsetilgen kómekke ol da razy ekenin aıtty.
Danıal Ahmetov bolsa, turǵyndardy qysyltaıań kezeńde tózimdilik tanytqandary úshin alǵys bildirdi.
«Sizderge kómektesý arqyly Prezıdentimiz Nursultan Nazarbaevtyń tapsyrmasyn oryndadyq. Ol bir de bir qazaqstandyq óz qıyndyǵymen jalǵyz qalmaý kerektigin tapsyrǵan bolatyn. Turǵyndardyń kóńili jaıly ekenin kórip men de qýanyp turmyn» - dedi ol.
Apattyń aýqymy orasan bolǵanyna qaramastan, zyrıandyqtardyń bolashaqqa degen senimi nyq. Olar tipti ylǵaldy kókmtemniń dıqandarǵa paıdaly bolǵanyn aıtady. Bıyl bul aýdanda egin bitik shyǵady degen boljam bar.
