ShQO-daǵy sý tasqyny: Jaǵdaı qalypqa kelýde
SEMEI. QazAqparat - Sý tasqynynan zardap shekken Óskemen, Aıagóz, Glýbokoe, Shemonaıha, Qatonqaraǵaı aýdandarynda qazir jaǵdaı turaqtalyp jatyr. Qazir 1914 turǵyn úılerine oralǵan, dep habarlaıdy QazAqparat.
Naýryz aıynyń basynan beri Shyǵys Qazaqstan oblysynda 1371 úıdi sý basqan. Al búgingi kúni Zyrıan aýdanynda 308 úı Buqtyrma ózenindegi sý deńgeıi 1,5 metrge kóterilýinen sý astynda qalyp otyr. Bir aı boıy óńirden 3 myńǵa jýyq turǵyn qaýipsiz jerge kóshirildi.
Aldyn ala málimet boıynsha, saraptama júrgizilgen 83 úı qaıta qalpyna keltirýge jaramaıdy. Atap aıtqanda Óskemende - 7, Aıagózde - 35, Glýbokoe aýdanynda - 21, Shemonaıha aýdanynda - 16, Qatonqaraǵaı aýdandarynda - 4 úı.
Jalpy, sý tasqynynyń saldaryn joıý úshin oblys bıýdjeti rezervinen 689,2 mln teńge qarastyrylǵan. Búgingi kúni turǵyn úıdi qalpyna keltirý jumystaryna 195 mıllıon teńge bólindi. (Aıagóz aýdanyna - 80 mıllıon, Shemonaıhaǵa - 40 mıllıon, Glýbokoe aýdanyna 75 mıllıon teńge).
Sondaı-aq «Paryz» oblystyq qoǵamdyq qory arqyly turǵyn úıdi satyp alýǵa jáne kómekke 150 mln. teńge bólingen. Jáne aýdandarda da zardap shekkenderge aqsha jınaý úshin arnaıy esepshottar ashyldy. Mysaly, «Shemonaıha Bolashaq», «Zyrıan - bizdiń qala», «Damý», «Aıagóz Bolashaq», «Asyl» qoǵamdyq qorlary. Materıaldyq jáne qarjylyq kómek Astana, Pavlodar, Almaty, Batys Qazaqstan, Soltústik Qazaqstan oblystarynan keledi.
Sý tasqynynyń saldaryn joıý kezinde Shyǵys Qazaqstan oblysy TJD-nyń 407 tehnıkasy men qyzmetkeri tartyldy. Sondaı-aq, kómekke Ulttyq Ulan, ákimdik, kommýnaldyq qyzmetterdiń qyzmetkerleri tartyldy.
Al sý tasqynynan keıin qoqysty tazalaý jumystaryn 3100 erikti júrgizdi. Olardyń arasynda memlekettik qyzmetshiler, uıymdar men kásiporyndardyń qyzmetkerleri, stýdentter, partııalar men qoǵamdyq birlestikterdiń ókilderi bar. Qazir arnaıy komıssııa keltirilgen zalaldy baǵalaýda. Al baspanasyz qalǵan 20 turǵyn jańa úıdiń kiltin alǵan. Onyń 16-sy Aıagóz aýdanynyń turǵyny bolsa, 4 -eýi qatonqaraǵaılyq.
