ShQO-daǵy sý tasqyny: Glýbokoe aýdanynyń turǵyndaryna kómek kartasy taratyldy
ÓSKEMEN. QazAqparat - Qazaqstannyń Qyzyl jarty aı qoǵamy Glýbokoe aýdanynda tasqynnan zardap shekken 99 otbasyny 10,4 mln teńgeniń kómek kartasyn taratty, dep habarlaıdy QazAqparat tilshisi.
Bul qaıyrymdylyq sharany atalmysh uıym Bolat Ótemuratovtyń qorymen birlesip ótkizýde. Buǵan deıin Aıagóz aýdanynda dál osyndaı kómek sharasy uıymdastyrylǵan bolatyn.
Glýbokoe aýdanynda tasqynnan zardap shekken 195 otbasy, ıaǵnı 630 adam bar. Qaıyrymdylyq uıymy solardyń ishindegi áljýaz toptarǵa kómek kórsetpek. Aldyn ala júrgizilgen taldaýlar nátıjesinde uıym ókilderi 347 adamdy qamtıtyn 99 otbasyn iriktep alǵan eken. Onyń kóbi úıi túgel qıraǵandar men zeınetkerler, múgedekter men jalǵyzilikti analar, turmysy tómen otbasylar.
«Kómek kartasyn búgin taratyp bittik. Qyzmetkerlerimiz Glýbokoe, Beloýsovka kentterin, Veselovka, Zarechnoe, Predgornoe, Progress aýyldaryn aralap, kómek qajet úılerge karta aparyp berdi. Oblys ortalyǵyna bara alamaıtyndarǵa arnaıy kólik uıymdastyramyz. Olar biz bergen karta arqyly qajetti azyq-túlik pen gıgıenalyq kútim zattaryn, ashana buıymdaryn, kıim-keshek pen dári-dármek alady. Biz bergen karta Óskemendegi termınaly bar kez kelgen dúkenge jaramdy. Jalǵyz ǵana shart, kartaǵa tabak jáne ishimdik ónimderi berilmeıdi. Taratylǵan kartalardyń jıyntyq quny 10 410 000 teńge»,- deıdi uıymnyń tótenshe jaǵdaı boıynsha úılestirýshisi Rýslan Hrýşev.
