ShQO-daǵy sý tasqyny: Danıal Ahmetov ákimderge demalysta bosańsymaýdy tapsyrdy
ÓSKEMEN. QazAqparat - Shyǵys Qazaqstan oblysynyń ákimi Danıal Ahmetov Naýryz merekesi qarsańyndaǵy demalysta barlyq ákimderge bosańsymaýdy tapsyrdy, dep habarlaıdy QazAqparat tilshisi, ákimdiktiń baspasóz qyzmetiniń aqparatyna súıenip.
Sý tasqynymen kúres sharalary talqylanǵan selektorlyq jıynda Danıal Ahmetov aýdan jáne qala ákimderine Naýryz meıramy qarsańynda bosańsymaýdy tapsyrdy. Oblys aýmaǵynda tasqyn qaýpi saqtalýda.
«Qazgıdromet» mamandarynyń habarlaýynsha, kúnniń jyly raıy kez kelgen ýaqytta tasqyn qaýpin órshitýi múmkin.
Oblys ákimi ásirese Jarma aýdanynyń Shar qalasyna basa kóńil bólý qajettigin eskertti. Shar ózeniniń boıynda jyldyq qar mólsheriniń 30 paıyzy erip bitpegen. Osy ózenniń boıyndaǵy eldi mekender men Semeı-Qalbataý joly turaqty baqylaýda bolmaq. Sondaı-aq, Úrjar aýdanynyń qyratty ólkelerinde qar sýynyń jaıylý qaýpi bar.
«Danıal Ahmetov óziniń orynbasarlary men jergilikti ákimderge sýaǵarlar men aryq-bóget júıesiniń jaǵdaıyn nazarda ustaýdy tapsyrdy. Ár aýdan boıynsha aǵymdaǵy jaǵdaıdy beıneleıtin karta usynylyp otyr. Ol kartada ár aýdannyń qaı aýylynda, qandaı kóshede qar sýynyń mol jınalýy múmkin ekeni anyq kórsetilgen. Meıram kúnderi jergilikti ákimdikter osy oryndardy baqylaýda ustap, sýdyń úıler men kóshege jaıylýyn boldyrmaýy tıis» - delingen baspasóz qyzmeti taratqan habarlamada.
