ShQO-daǵy sý tasqyny: Ákim ýaqytsha baspananyń jaısyzdyqtaryn synǵa aldy

Tańǵy saǵat 7.00-den bastap oblys ákimi Danıal Ahmetov Glýbokoe aýdanynda tasqynnan zardap shekken aýyldardy aralady. Glýbochanka ózeniniń boıynda jatqan eldi mekenniń biri - Progress aýyly. Munda 50 úıdi sý basyp, 222 adam qaýipsiz jerge kóshirilgen eken. Úı ishindegi sýdyń tereńdigi 40-60 santımetrge jetken. Olarǵa kirmek túgil, aýlasyna aıaq basýdyń ózi qaýipti. Sondyqtan, ár kóshege kezekshi qoıylypty. Apattan esin jıǵan halyq úıiniń jaǵdaıyn kórý úshin kelgenimen, aýlasyna da kire almaı, keri qaıtyp jatty. Úıin tastap shyqqan turǵyndardyń kóbi Óskemen men Glýbokoe kentindegi týystaryn panalaǵan eken. Al aýyl mektebin 9 zeınetker panalaýda. Danıal Ahmetov olardyń árqaısymen jeke-jeke sóılesip, talap-tilekterin tyńdady. Sondaı-aq, ol mektep bazasynda  uıymdastyrylǵan ýaqytsha baspananyń jaısyzdyqtary bar ekenin eskertti.

«Bir bólmege 10 tósek qoıǵansyzdar. Bul eshqandaı sanıtarlyq talapqa syımaıdy. Kórpe-jastyq, kıim-keshektiń bári taza bolýy kerek. Eki saǵattyń ishinde ýaqytsha turǵyndardyń jaǵdaıyn jaqsartyńyzdar» - dedi ol.
 

Ózen sýynyń molaıýyna Beloýsovka kentindegi bógetten kóp mólsherde sý jiberilýi sebepshi boldy degen boljam keshe de aıtylǵan bolatyn. Danıal Ahmetov bóget basyna baryp, onyń jaǵdaıyn kózben kórdi. Bógettiń sýaǵary rettelmeıtin bolyp shyqty.

Aýdan ákimi Qalıhan Baıǵonysovtyń aıtýynsha, nysan 2000 jyldan beri «Qazmınerals» kompanııasynyń basqarýyna berilgen eken.

«Bógetten aqqan sýdy retteý múmkin emes. Qajetti mejege jetken soń artyq sý ózdiginen aǵyp otyrady. Syrtqa shyqqan sýdyń Glýbochanka ózenine qosylatyny ras. Ózenniń arnasynan asýyna osy jaǵdaı da sebepshi bolǵan» - deıdi aýdan ákimi.
 

Beloýsovka kentiniń ózinde 52 úıdi sý alǵan. Onyń keıbirinde eshkim turmaıtynyn anyqtalypty. Qaýipsiz jerge kóshirilgen 42 adamnyń 23-i agrarlyq kolledjdiń ǵımaratyna ornalastyrylǵan. Ýaqytsha baspanany balarymen panalap jatqan Ásem Ahmetjanova esimdi turǵyn úıine qarǵyn sýy 11 naýryzdan bastap kirgenin aıtady.

«Alǵash sý 11 naýryzda kirdi. Qora men ashanany, úıdiń eki bólmesin qyzyl asyqtan keletin sý alyp qaldy. Kómek kelmegen soń erteńinde ákimdikke bardym. Olar sý sorǵy ákelgenimen, muz bop qatqan sýdy sorǵyta almady. Osylaısha úıimiz bir apta boıy qarǵyn sýdyń qursaýynda turdy. Úıde densaýlyǵy nashar qarııa bar bolatyn. Ony týysqandarymyzǵa apardyq. Ózim balammen aýrýhanaǵa jatyp shyqtym» - deıdi Ásem Ahmetjanova.
 

Aıaq astynan úılerin tastap shyqqan turǵyndardyń kóbi qujattan basqa zattaryn alyp úlgermegenderin aıtýmen boldy. Danıal Ahmetov úıine kire almaı qalǵan turǵyndardy  eń qajet degen zattarmen qamtý úshin birinshi kezekpen 10 mln teńge bóletinin aıtty. Al shyǵynnyń ornyn toltyrý jumystary úılerdiń barlyǵy esepke alynǵan soń júrmek.

Glýbokoe kentine túndeletip jetken aýyr tehnıkalar aǵynnyń keptelisin báseńdetipti. Degenmen, munda da jaǵaǵa jaqyn ornalasqan úılerdiń kóbine áli de bolsa kirý múmkin emes.
 

 Predgornoe aýylynda 35 úıdi sý basqan eken. Qazir tasyǵan sýǵa eki qatar bóget ornatylýda. Danıal Ahmetov mundaǵy jumystardyń júıeli uıymdastyrylǵanyn atap, aýlalarǵa toqtaǵan topan sýdy sorǵytýdyń amaldaryn qarastyrýdy tapsyrdy. Kólkigen sýdyń ortasynda turǵan birneshe úıdi aralaǵan aımaq basshysy turǵyndarǵa barlyq shyǵyndy memleket óteıtinin jetkizdi. Mundaǵy eldiń keıbiriniń úıine sý tizeden kirse, keıbiriniń aýladaǵy kóligi otalmaı qalǵan.  Toqtaý sýdyń tizeden asatynyna qaramastan, turǵyndar úılerine kelip, malyn jaıǵap, múlikterin túgendeýde.

«Bul aýdanda sý basqan úılerdiń sany 167-ge jetti. Shyǵyn áli eseptelýde. Ásirese Beloýsovka jáne Glýbokoe kentteri, Progress jáne Predgornoe aýyldary qatty zardap shekken. Bul jaǵdaı jylda qaıtalanbas úshin keıbir jerde ózen arnasyn keńeıtip, keıbir tustaǵy úılerdi múlde qaýipsiz orynǵa kóshiremiz. Erteń saǵat 11:00-ge deıin alǵashqy kómekke qajet qarjyny tıisti shotqa aýdaramyz» - dedi Danıal Ahmetov.