ShQO-daǵy statsıonarlarda naýqastarǵa oryn joq degen aqparat jalǵan - ákimdik
ÓSKEMEN. QazAqparat - Shyǵys Qazaqstan oblysyndaǵy statsıonarlarda naýqastarǵa arnalǵan oryn joq degen aqparat joqqa shyǵaryldy, dep habarlaıdy QazAqparat tilshisi.
Sońǵy kúnderi áleýmettik jelide Óskemendegi juqpaly aýrýlar statsıonarlarynyń dárigerleri turǵyndardy aýrýhanaǵa jatqyzýdan bas tartyp jatqany týraly vıdeo tarady. Buǵan qatysty ShQO Densaýlyq saqtaý basqarmasynyń basshysy túsinik berdi.
« Búgingi tańda Shyǵys Qazaqstanda 3709 ınfektsııalyq tósek oryn bar bolsa, aýrýhanalarda 720 adam emdelip jatyr. Óńir boıynsha tósek qory 19 paıyzǵa ǵana júktelgen. Atap aıtqanda, Óskemende statsıonarlarǵa 1240 adamdy ornalastyrý múmkindigi bar, al qazirgi ýaqytta 464 turǵyn aýrýhanaǵa jatqyzyldy. Demek, qaladaǵy tósek qorynyń júktemesi 37,4 paıyzdy quraıdy. Áleýmettik jelide taraǵan vıdeoda Óskemen qalasynyń aýrýhanasyna Zaısannan kelgen naýqas týraly aıtylǵan. Beınematerıalda dárigerlerdiń ony aýrýhanaǵa jatqyzýdan bas tartqany kórsetilgen. Negizinen buǵan klınıkalyq hattamalarǵa sáıkes, naýqasty aýrýhanaǵa jatqyzýǵa qajetti kórsetkishteriniń bolmaýy sebep boldy», - dedi Ermek Omarbekov.Onyń aıtýynsha, vıdeoda másele tolyq kórsetilmegen. Tek úzindileri ǵana alynǵan.
« Bizdiń statsıonarlarymyzda oryn jetkilikti, koronavırýsty emdeýge arnalǵan dári-dármekterdiń eki aılyq qory qamtamasyz etilgen. Dıagnostıka jasaý jáne emdeý hattamasynda belgili bir erekshelikter bar. Olarǵa sáıkes, keıbir patsıentterdi úı jaǵdaıynda, keıbir naýqastardy statsıonarda emdeý qajet. Eger sizde dene qyzýy nemese basqa da belgiler paıda bolsa, birden aýrýhanaǵa barýdyń qajeti joq. Turǵylyqty jerińiz boıynsha emhanaǵa qońyraý shalyp, ýchaskelik dárigerdi shaqyryńyz. Jaǵdaıyńyz nasharlaǵan jaǵdaıda ǵana aýrýhanaǵa jatýǵa bolady», – dep túsindirdi basqarma basshysy.Talǵatjan Muhametbekuly
