ShQO-daǵy shekaralyq aýyldarǵa joǵary jyldamdyqty ınternet tartylady

ÓSKEMEN. QazAqparat – Shyǵys Qazaqstan oblysy Tarbaǵataı aýdanyndaǵy birqatar aýyl turǵyndary 4G tehnologııasy boıynsha mobıldi ınternetpen qamtamasyz etiledi, dep habarlaıdy QazAqparat tilshisi.

Bul týraly Tarbaǵataı aýdanynyń ákimi Ashat Smaılov esep berý kezdesýinde aıtty. Qazirgi epıdemıologııalyq jaǵdaıǵa baılanysty jıynǵa ShQO ákimi Danıal Ahmetov pen aýdan turǵyndary onlaın formatta qatysty.

Kóp jyldar boıy Tarbaǵataı aýdanyndaǵy shekaralyq aýyldar turǵyndary úshin ınternet sapasy kún tártibinde turǵan ózekti másele bolǵan.

Aýdan ákiminiń aıtýynsha, osy másele oń sheshimin tabý úshin búginde aýyldarǵa baılanys ornatý jumysy qarqyndy júrip jatyr.

«Ótken jyldyń I toqsanynda keń jolaqty shyny-talshyqty ınternet baılanys júıesi Tarbaǵataı aýdanyna qarasty 11 eldi mekenge tartyldy. Jalpy uzyndyǵy 260 shaqyrymdy quraıtyn kabel 8 aýyldyq okrýgtiń ákimshilik ǵımaratyna, 8 emhanaǵa, 8 ýchaskelik pýnktke jáne 19 mektepke ornatylǵan. Aldaǵy ýaqytta osy aýyldardyń turǵyndary 4G júıesimen qamtamasyz etiledi. Jalpy ótken jyly osy maqsatta 543 mln teńge bólingen. Bıyl da bul jumystar jalǵasyn tabady», - dedi aýdan ákimi.

Jıynǵa qatysqan aımaq basshysy Danıal Ahmetov aýdandaǵy koronavırýs ınfektsııasynyń aldyn alý sharalaryna oń baǵa berdi.

«Pandemııa bastalǵaly beri aýdan boıynsha vırýs juqtyrǵan 559 adam tirkelgen. Sońǵy ýaqytta bul kórsetkish múlde azaıdy. Bul aýdandaǵy indettiń aldyn alý sharasy men medıtsınasynyń sapasyn kórsetedi. Ótken jyly Aqsýat aýylyndaǵy eski aýrýhana ǵımaratyna kúrdeli jóndeý jumystaryn júrgizýdi tapsyrǵan bolatynmyn. Sondaı-aq Aqjar aýylyndaǵy №2 aýdandyq aýrýhana ǵımaratynyń lıftisi 18,2 mln teńgege, Aqsýat aýylyndaǵy aýdandyq aýrýhananyń jylý qazandyǵy 37,6 mln teńgege kúrdeli jóndeýden ótti. Aýrýhanalardy zamanaýı jabdyqtarmen qamtamasyz etý maqsatynda 244 mln teńgege 22 medıtsınalyq jabdyqtar satyp alynyp, aýdanǵa 9 jedel járdem kóligi berildi», - dedi oblys ákimi.