ShQO-daǵy shekaralyq aýdandarda jol jóndeýge qatysty 37 joba iske asyrylady
ÓSKEMEN. QazAqparat – Shyǵys Qazaqstanda bıyl oblystyq jáne aýdandyq mańyzy bar joldardy jóndeýge 11 mlrd teńge jumyldyryldy, dep habarlaıdy QazAqparat tilshisi.
Bul jaıly Aqparat ortalyǵynda ótken baspasóz máslıhaty barysynda ShQO Jolaýshylar kóligi jáne avtomobıl joldary basqarmasy basshysynyń mindetin atqarýshy Nurbek Turarov málim etti.
«Óńir boıynsha osy jyly jol jóndeýge qatysty 122 jobany iske asyrý josparlanyp otyr. Semeıdegi kólik kópirin qaıta jańǵyrtý jumystary bastalady. Joba quny – 30 mlrd teńgeden asady. Qurylysty bastaýǵa respýblıkalyq bıýdjetten 1 mlrd teńge bólindi. Óskemende tramvaı joldaryn jańǵyrtý, Belınskıı, Karbyshev, Bazovaıa kóshelerin rekonstrýktsııalaý kózdelýde», - dedi ol.
Beloýsovka aýylynda eki kópirdiń qurylysy bastalǵan. Budan bólek, byltyrdan beri Rıdder qalasyndaǵy Fılıppovka men Úlbi ózenderi arqyly ótetin kópirlerdiń qurylysy júrgizilip jatyr. Jobany bıyl aıaqtaýǵa 37,5 mıllıon teńge bólingen.
Shekaralyq aýdandarda joldar men kóshelerdi ortasha jóndeý boıynsha 37 joba iske asyrylady. Onyń ishinde Katonqaraǵaı aýdanynda – 7, Kúrshim aýdanynda –2, Tarbaǵataı aýdanynda – 9, Úrjar aýdanynda – 8, Borodýlıha aýdanynda – 5, Shemonaıha aýdanynda – 6 joba.
Esterińizge sala ketsek, osyǵan deıin ShQO-da bıyl órtten qaza bolǵandar sany 46 paıyzǵa azaıǵanyn habarlaǵan edik.
