ShQO-daǵy shekara mańynda shyqqan iri órt sóndirildi
ÓSKEMEN. QazAqparat – Shyǵys Qazaqstan oblysyndaǵy memlekettik shekara mańynda shópke jaıylǵan órt sóndirildi, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, sońǵy kúnderi óńirde 53 ret shóp pen qoqys órtengen. Onyń ishindegi eń irileri – Zaısan, Kúrshim jáne Kókpekti aýdandarynda boldy.
Taıaýda túngi saǵat 00.05-te órt sóndirýshilerge Zaısan aýdany Qaratal aýyldyq okrýgindegi Eleke ýchaskesinde shóptiń janyp jatqany týraly habar túsken. Jergilikti atqarýshy organ ókilderi men shekarashylar shuǵyl órtti sóndirýge kiristi. Alaıda qatty jeldiń saldarynan jalyn odan saıyn taraı bastaǵan. Tilsiz jaýdy aýyzdyqtaýǵa №25 órt sóndirý bóliminiń 7 qyzmetkeri tartyldy. Olar kelip jetkenshe ot 30 gektar aýmaqqa jaıylyp ketti.
«Órt shekaradan eki shaqyrym qashyqtyqta sóndirildi. Aldyn ala málimet boıynsha qyzyl jalyn naızaǵaıdan shyqqan. Dál osy ýaqytta Kúrshim aýdanyndaǵy Býran aýylynda da shóp órtendi. Tilsiz jaýdy jergilikti atqarýshy organdar men ormanshylar óshirmekke árekettendi. Keshke saǵat 19.00-de jel kúsheıgendikten sol jerge №40 órt sóndirý bóliminiń qyzmetkerleri attanǵan. 25 gektar aýmaqty sharpyǵan ot 22.40-ta sóndirildi», - dep habarlady vedomstvo ókilderi.
Sonymen qatar Kókpekti aýdanynda qýraǵan aǵashtar órtendi. Bıǵash aýyldyq okrýgindegi Qııaqty ýchaskesinde shyqqan qyzyl jalynnyń jalpy aýmaǵy 45 gektarǵa jetken. Qazirgi ýaqytta órt áli tolyqtaı óshirilgen joq. №33 órt sóndirý bóliminiń qyzmetkerleri, jergilikti atqarýshy organ ókilderi, ormanshylar men jergilikti turǵyndar tilsiz jaýmen kúresýde.
