ShQO-daǵy ózenderdi «jaryp» jatyr
ÓSKEMEN. QazAqparat - Shyǵys Qazaqstan oblysynda ózen arnalaryna keptelgen muzdardy jarý jumystary júrip jatyr, dep habarlaıdy QazAqparat tilshisi.
«Munyń aldynda ózen arnasyna muz keptelip, qyzyl sý jaıylatyn oryndar anyqtalǵan bolatyn. Sol oryndardy jarylǵysh zattar arqyly muzdan arshý jumystary bastaldy» - deıdi oblystyq tótenshe jaǵdaılar departamentiniń baspasóz qyzmeti.
Sońǵy úsh kúnde Shemonaıha jáne Borodýlıha aýdandarynda muz qatqan arnalarǵa jarylǵysh zattar qoıylǵan bolatyn. Bul eki aýdanǵa ásirese Úbe ózeni qaýip týǵyzýy múmkin. Mamandar jarylystyń kóbi osy ózenniń boıynda jasalǵanyn aıtady.
Keıbir jarylystar eldi mekenderge jaqyn aýmaqta ótetindikten, qoparý jumystary belgili bir ýaqyt aralyǵyn saqtap uıymdastyrylýda. Bul óz kezeginde muzdy arshý jumystaryn baıaýlatýda. Óıtpegen jaǵdaıda terbelister sýdyń arnadan asýyna ákep soqtyrýy múmkin.
«Búgingi jarylystar Ýbınka jáne Verh-Ýba aýyldarynyń mańynda ótti. Shemonıha qalasyna kire beristegi kópir mańyn da muzdan arshydyq» - deıdi Shemonaıha aýdany ákimdiginiń azamattyq qorǵanys jáne jumyldyrý daıyndyǵy jónindegi bas ınspektory Evgenıı Peschannıkov.
Tótenshe jaǵdaı qyzmeti óńirde jaǵdaı turaqty bolǵandyqtan, ózenderdi «jarý» jumystary jalǵasatynyn aıtty.
