ShQO-daǵy órt úsh balanyń ómirin qıyp ketti
ÓSKEMEN. QazAqparat – Shyǵys Qazaqstan oblysynda eki órt oqıǵasy bolyp, úsh bala kóz jumdy, dep habarlaıdy QazAqparat ShQO TJ departamentiniń Azamattyq qorǵaý salasyndaǵy apattar táýekelin tómendetý jáne baqylaý basqarmasyna silteme jasap.
TJ departamentinde keshe Ulan jáne Borodýlıha aýdandarynda órt bolǵanyn habarlady. Asýbulaq aýylynda tilsiz jaý jer úıdi tolyǵymen jalmap ótken. Keıinnen órttiń elektr jylytý qondyrǵylarynyń jylý áserinen bolǵandyǵy belgili boldy.
«Úıde 73 jastaǵy atasy men bala kezinde sal aýrýyna shaldyqqan onyń 14 jasar nemeresi turǵan. Egde jastaǵy adam halyqtyń áleýmettik osal toptary tiziminde bolǵan. Órt sóndirýshiler oǵan birneshe ret baryp, órt qaýipsizdiginiń talaptaryn kórsetip, nusqaý bergen. Aqyr sońynda qosylyp turǵan elektr jylytqysh, qyzǵan spıral jáne olarǵa jaqyn ornalasqan zattar qaıǵyly jaǵdaıǵa soqtyrǵan», - dep túsindirdi basqarmada.
Órt sóndirýshilerge jalyndy óshirýge birneshe saǵat qajet bolǵan. Órt aýmaǵy 150 sharshy metrdi qurady. Tekserý kezinde uıyqtaıtyn bólmede edennen qarııanyń, al tósek janynan balanyń jansyz deneleri tabylǵan.
Sol kúni Borodýlıha aýdanynyń Kamyshenka aýylynan taǵy bir qaıǵyly oqıǵa týraly habar kelgen. Aǵaly-inili eki bala órtten kóz jumǵan. Surastyrý barysynda 4 jáne 5 jastaǵy balaqaılar úıde jalǵyz qalǵan. Otbasylyq janjaldyń saldarynan ishimdikke toıyp alyp, úıden ketip qalǵan otaǵasyn áıeli izdeýge shyqqan. Al balalardy syrtynan qulyptap ketipti.
Kýágerlerdiń aıtýynsha, balalar ashyq qoljetimdi jerde turǵan sirińkemen júıeli túrde oınap júrgen. Órt aýmaǵy shamaly boldy, bar-joǵy - 2 sharshy metr. Osy fakti boıynsha materıaldar polıtsııa qyzmetkerlerine berildi, olar aldaǵy ýaqytta osy isti júrgizetin bolady.
ShQO TJD-da jylytý maýsymy bastalǵannan beri oblys boıynsha 500-den astam órt oqıǵasy oryn alǵanyn atap ótti. 40% -ǵa jýyq- jer úı sektorynda tirkelgen. Órttiń basym kópshiligi otty durys jaqpaýdan, peshtiń durys jumys istemeýinen, elektr jabdyqtaryn ornatý jáne paıdalaný erejelerin buzý saldarynan oryn alǵan. 13 oqıǵa balalardyń otpen oınaý shalalyǵynan bolǵan, biraq olardyń bári qaıǵyly oqıǵamen aıaqtalǵan joq. Jylý berý kezeńi bastalǵannan beri tilsiz jaý 13 adamnyń ómirin jalmaǵan, olardyń úsheýi - keshe eresekterdiń uqypsyzdyǵy men abaısyzdyǵynan ajal qushty.
Avtory:
Oral Erlanuly
