ShQO-daǵy órt bir adamnyń ómirin qıyp ketti

NUR-SULTAN. QazAqparat – Rıdder qalasynyń irgesindegi órt bir áıeldiń ómirin jalmady. Taǵy eki adam jansaqtaý bóliminde jatyr, dep habarlaıdy QazAqparat tilshisi.

Bul týraly Tótenshe jaǵdaılar mınıstrliginiń resmı ókili Talǵat Ýálı málim etti.

«Órt sóndirý jumystaryn ekpini sekýndyna 20 metrge jetetin qatty jel qıyndatýda. Jeldiń saldarynan órt Leshoz kentiniń 14 úıine jaıyldy. Qutqarýshylar Lıhachev kóshesiniń 10 turǵynyn evakýatsııalady. Órt oshaǵynda orman sharýashylyǵy jeke quramynyń, jergilikti atqarýshy organdardyń jáne oblystyq tótenshe jaǵdaılar departamentiniń 118 adamy jáne 20-dan astam tehnıkasy jumys istep jatyr. Qazir janyp jatqan orman alańy 310 gektarǵa jetti», - deıdi mınıstrliktiń resmı ókili.

Onyń sózinshe, órt sóndirýshilerge orman kúzetiniń MI-8 jáne MI-2 tikushaqtary kómekke kelip, áýeden 17 500 tekshe metr sý tókken.

«Jedel járdem jelisi boıynsha Leshoz kentinen 1949 jáne 1980 jylǵy kúıik shalǵan eki er adam jergilikti aýrýhananyń jansaqtaý bólimine jetkizilgeni týraly aqparat kelip tústi. Polıtsııa qyzmetkerleri jalyn sharpyǵan aýmaqtaǵy tóbeshikten 1948 jyly týǵan áıeldiń máıitin taýyp aldy. Mán-jaılar men derekter naqtylanýda.

Aldyn ala nusqa boıynsha mamandar qasaqana órt qoıý jáne otty abaısyz qoldaný nusqalaryn qarastyrýda», - deıdi Talǵat Ýálı.